UMABOT na sa 33 katao ang patay sa panghahalihaw ng saksak ng mga suspek sa tinaguriang “violent terrorist attack” sa isang estasyon ng tren sa Kunming, China.
Sa ulat ng state news agency Xinhua, nasa 143 katao ang nasugatan sa nasabing pag-atake ng hinihinalang kasapi ng mga tumutuligsa sa pamahalaan.
Sa ulat ng Xinhua: “It was an organized, premeditated violent terrorist attack.”
Sa salaysay ng isang pasaherong bibili ng tiket sa istasyon na si Yang Haifei, isang grupo ng karamihan ay nakaitim ang pumasok sa istasyon at nagsimulang umatake gamit ang mahabang panaksak at patalim.
Nagimbal ang Chinese microblogging service na Sina Weibo sa post at mga larawan ng insidente na nakabulagta ang mga duguang biktima.
Limang suspek ang nabaril ng mga awtoridad habang lima pa ang pinaghahanap at agad ipinag-utos ni Chinese President Xi Jinping ang pagtugis sa mga suspek.
Pahayag ng Pangulo sa Xinhua: “Severely punish in accordance with the law the violent terrorists and resolutely crack down on those who have been swollen with arrogance.”