Racal PoW ng NCAA

DAHIL sa kanyang mahusay na laro para sa Letran kontra Mapua noong Sabado, napili ng NCAA Press Corps si Kevin Racal ng Knights bilang Player of the Week.

Nagtala si Racal ng 23 puntos at 10 rebounds sa 77-70 na panalo ng Knights kontra Cardinals upang mapanatili ang kanilang liderato sa NCAA sa kanilang siyam na panalo kontra sa isang talo.

“He is a very good role player. Hindi siya yung masasabi mong superstar because he is really in the mold of a defensive player na kapag pumutok siya sa offense, malaking bagay talaga siya,” wika ni Letran head coach Caloy Garcia tungkol kay Racal.

Nag-average si Racal ng 10.4 puntos, 7.4 rebounds at 2.9 assists bawat laro sa unang round ng eliminations ng NCAA.

Bago nito, humataw si Racal ng 14 puntos sa 74-67 na panalo ng Letran kontra defending champion  San Beda Red Lions sa pagtatapos ng first round.

(James Ty III)