2 MMDA street sweeper sugatan sa van ng parak

SUGATAN ang dalawang  street sweeper ng Metro Manila Development Authority (MMDA) makaraang masagasaan nang rumaragasang van na minamaneho ng isang pulis kahapon ng umaga sa nabanggit na lungsod.

Sa ulat ng Quezon City Police District-Traffic Enforcement Unit Sector 3, malubhang nasugatan si Renato G. Bakain, 57, nakaratay sa East Avenue Medical Center, residente ng Pasig City. Siya ay nagkaroon ng bali sa paa at nabagok ang ulo.

Habang si Christina Carreon, 50, residente ng Tondo, Manila, ay nagalusan lamang.

Samantala, agad sumuko ang pulis na si PO3 Eleazar Faustino, nasa kustodiya na ng Taffic Sector 3.

Ayon sa ulat ng pulisya, dakong 9 a.m., nagwawalis ang dalawang biktima sa lugar nang sagasaan sila nang rumaragasang puting Nissan Urvan (AQA 7396) na minamaneho ni Tabilin.

Ayon kay Carreon, si Bakain ang nagkaroon nang malalang pinsala makaraan tumilapon dahil sa lakas ng pagkakabundol habang siya ay nahagip lamang kaya nagkaroon ng minor injuries.

Ayon kay PO2 Jordan Junio ng Traffic Sector 3, nangako si PO3 Faustino na sasagutin ang lahat ng gastusin sa ospital.

Samantala, ayon sa pamunuan ng MMDA, kanilang kakasuhan ang pulis.

( ALMAR DANGUILAN )