31-anyos ship oiler nagbigti sa fire exit

PATAY ang isang 31-anyos ship oiler nang magbigti sa fire exit ng isang gusali sa Malate, Maynila kamakalawa.

Kinilala ang biktimang si John Robert Gregg Elejan, walang asawa, tubong Guimaras, Iloilo City at walang permanenteng tirahan.

Ayon sa imbestigasyon ni PO3 Alonzo Layugan ng Manila Police District Homicide Section, dakong 3:10 p.m. nang matagpuan ang biktima habang nakabigti sa fire exit sa ground floor ng Status Maritime  Corp. sa 1802 San Marcelino Street, Malate.

Inihayag ng isang Rex Barcebal, nang dumaan siya sa fire exit ay nagulantang nang makitang nakabigti ang biktima kaya agad niyang ipinagbigay-alam sa security guard.

Isinugod ang biktima sa Philippine General Hospital ngunit idineklarang dead on arrival ng mga doktor.

Patuloy ang imbestigasyon ng pulisya upang matiyak kung may naganap na foul play sa insidente.