Pinay tiklo sa entrapment sa P5-M extortion sa New Zealand national

ARESTADO ang isang 38-anyos Filipina sa entrapment operation ng Pasay City Police makaraang kikilan ng P5 milyon ang lover niyang isang New Zealand national kapalit nang hindi pag-post sa social media (facebook) sa hubad na larawan ng dayuhan dahil hihiwalayan na ang babae kamakalawa sa Pasay City.

Kinilala ni Pasay City Police chief, Sr. Supt. Joel B. Doria, ang suspek na si Irene Riva Boquiron, walang trabaho, ng 1628 Bulacan St., ng naturang lungsod.

Habang kinilala ng pulisya ang biktimang si Raymond Alden Adlam, 46, may asawa, New Zealand national, pansamantalang nanunuluyan sa 1304 Fraser Place, Valero  St., Salcedo Village,  Makati City.

Sa report ng pulisya, naaresto si Boquiron ng mga pulis sa isang entrapment operation sa  Seafood Island Restaurant sa SM Mall of Asia Complex, Pasay City dakong 4:35 p.m.

Aniya sa biktima, pinagbantaan siyang ipo-post sa social media (facebook) ang nakahubad niyang mga larawan.

Hiningan aniya siya ng suspek ng halagang P5 milyon para hindi i-post ang hubo’t hubad niyang litrato, ngunit bumaba sa halagang P50,000.