PDEA operatives pa kontra ilegal na droga — BBM

SINABI ngayon ni Senator Ferdinand “Bongbong” R. Marcos, Jr.,  na kailangang dagdagan ang mga field operatives ng Philippine Drug Enforcement Agency (PDEA) para mapaigting ang kampanya laban sa panganib ng ilegal na droga.

“Kung kulang ang mga operatiba ng PDEA na umiikot sa mga komunidad malabong magtagumpay ang ating kampanya laban sa ilegal na droga,” ani Marcos.

Nauna rito naalarma ang senador matapos iulat ng PDEA na 92 porsyento ng mga barangay sa Metro Manila ay apektado na ng illegal na droga.

Dahil dito nanawagan ang senador na ituon ng ahensiya ang kampanya laban sa malalaking sindikato ng droga.

“Ang field agents ay mayroong mga sariling sources na makapagbibigay ng impormasyon na maaaring magamit ng PDEA para masakote ang malalaking sindikato ng droga sa bansa,” ani Marcos.

Ang masaklap, aabot lamang sa 892 ang field operatives ng PDEA na nakakalat sa 17 regional offices ng ahensiya.

“Talagang kulang na kulang ang ating mga field operatives. Dapat din nating bigyan ng kakayahan ang PDEA na gawin ang misyon nila,” dagdag ng senador

Ayon kay Marcos, bubusisiin niya ang 2016 budget ng PDEA sa pagtalakay ng Senado upang malaman kung paano maaaring madagdagan ang plantilla position para sa mga field operatives ng ahensiya.

Bukod rito, sinabi ng senador na dapat ayusin ng PDEA ang reward system upang makakuha ng impormasyon laban sa mga sindikato ng ilegal na droga.

Dapat din umanong pasiglahin ng PDEA ang pakikipagtulungan sa mga opisyal ng barangay at mga community volunteers upang lalong mapalakas ang kampanya laban sa illegal na droga.