Sexy Leslie: Sinisisi ang ex

Sexy Leslie,

Napariwara ang buhay ko dahil sa labis na pagmamahal. Apat na taon kami ng nobya ko nang iwan niya ako. Hindi ko akalaing sa kabila ng lahat ay magagawa niya akong ipagpalit sa iba. Dahil sa matinding kabiguan, lumayo ako at napasali sa ibang grupo. Nakagawa ako ng masama kung kaya’t ilang taon akong nabilanggo. Ngunit ngayong malaya na, siya pa rin ang sinisisi ko bakit nasira ang mga pangarap ko. Ano ba ang dapat kong gawin? Glyynne

Sa iyo Glyynne,

Hindi ka dapat magdusa! Tulungan mo ang iyong sarili na makalaya sa anino ng nakaraan. Tapos na ang kahapon kaya mabuhay ka na sa kasalukuyan. Napagbayaran mo na rin ang anumang kasalanang nagawa mo. Tama na rin ‘yang paninisi sa kanya dahil lalo mo lamang pinalalalim ang sugat na nilikha ng labis na pagmamahal.

Masaya na ang iyong ex at kung talagang minahal mo siya, matatanggap mo kung saan siya maligaya. May dahilan kung bakit kayo nagkalayo at may dahilan kung bakit sa isang iglap naligaw ka ng landas. Ngayong malaya ka na at nakahandang humarap sa mundo, magtiwala kang muli sa iyong sarili.