CIDG ‘kolektong isyu’ matutukan kaya?

ANG Criminal Investigation and Detection Group (CIDG) ay isa sa mga pangunahing ahensiya ng pulisya na pinagkakatiwalaan sa paglaban sa mga kri-minal at sindikato.

Kaya malaking kasiraan sa grupo ang nakalap nating report na namamayagpag din sila sa pagkolekta ng tong, na tulad ng ilang miyembro ng Philippine National Police na nabalitaang nalugmok sa putik ng katiwalian.

Dalawang yunit ng CIDG na sinasabing aktibo sa kolektong angWomen and Children Complaints Office (WACCO) at Anti-Transnational Crime Division (ATCD).

Nakapanghihinayang kung totoo ito dahil ang WACCO ang nakatoka sa mga kaso ng karahasan laban sa kababaihan at kabataan na nahaharap sa panganib o pagsasamantala.

Ang ATCD ay special unit na naatasan namang humawak ng mga kaso ng transnational crimes at pati na ang human trafficking.

Pero bukod sa training para protektahan ang mga kababaihan at kabataan laban sa pang-aapi at pang-aabuso, dumaraan pa umano sa espesyal na pagsasanay ang mga pulis ng WACCO at ATCD kung paano kokolektahan ng tong ang mga establisimiyento na kanilang sasalakayin.

Isang WiIliam Cajayon na dating pulis QC na nasibak sa serbisyo, ang nangongolekta umano ng tong ng WACCO at ATCD para kay Superintendent Romeo Baleros, hepe ng WACCO sa buong Metro Manila.

Na-entrap daw si Cajayon ng NBI sa panghuhulidap at inireklamo sa isang programa sa TV. Kahit na-dismiss ay nagpapanggap daw na pulis ngayon sa pangongolekta ng tong. Lagi rin umano itong may dalang uniporme ng pulis sa kotse para makita ng kinikikilan niya.

Ang patuloy ba nilang pagbibigay ng tong para sa mga tiwaling opisyal ang dahilan kaya hindi matigil-tigil ang pamamayagpag ng mga ile-galista sa likod ng mga nightclub at bahay-aliwan sa Metro Manila, at sa walang takot nilang pag-aalok ng mga kabataang babae sa kanilang mga parokyano?

Ang dating CIDG chief na si Director Benjamin Magalong ay itinalaga bilang officer-in-charge ng Directorate for Investigation and Detective Management.

Ngayong pinalitan siya sa CIDG ni Chief Superintendent Victor Deona, ipaaaresto kaya niya si Cajayon at paiimbestigahan kung ang hepe nga ng WACCO ang ipinangongolekta nito? Kung wala siyang gagawing aksyon ay baka isipin ng iba na pati siya ay bahagi ng katiwalian.

***

SHORT BURSTS. Para sa mga komento o reaksiyon, mag-email [email protected] o mag-tweet sa @Side_View.

FIRING LINE – Robert B. Roque, Jr.