Dayuhang retailer sinaksak ng helper (Separation pay hindi ibinigay)

ISANG Chinese national na nagnenegosyo bilang retailer sa bansa ang sinaksak ng sinibak na helper sa Pasay City kamakalawa.

Nakaratay at inoobserbahan sa San Juan De Dios Hospital ang biktimang si Xu Wan Yu, 19, ng 2741 Taft Avenue, Pasay City, inabot ng saksak sa likod.

Tinutugis ng pulisya ang suspek na Michael Mabugnon alyas Tangkad, 32, tubong Brgy. Cacay Ronabor, Tubod, Lanao del Norte, at naninirahan sa 047 Transmitter Area, Zone 19, Brgy 184, Maricaban, Pasay City.

Sa imbestigasyon nina SPO3 Allan Valdez at PO3 Lorene Osias, dakong 4:48 p.m. nang mangyari ang insidente sa Sunny Line Shopping Center na pag-aari ng biktima at ng kapatid niyang si Wan Fan Su, sa 2988 Taft Avenue ng nasabing lungsod.

Sinasabing sinibak sa trabaho ni Wan Fan Su ang suspek bilang helper sa kanilang tindahan sa hindi binanggit na dahilan.

Kahapon, nagtungo ang suspek sa tindahan para kunin ang kanyang separation pay ngunit nabigo siya.

Bunsod nito, nagalit ang suspek, binunot ang dala niyang patalim saka inundayan ng saksak sa likod ang biktima at pagkaraan ay mabilis na tumakas.

J. Garcia