Sanggol tumilapon sa irigasyon nalunod

NALUNOD ang 2-anyos sanggol na lalaki nang malaglag mula sa sinasakyang motorsiklo at nahulog sa irigasyon sa Brgy. Bisaya, Vintar, Ilocos Norte kamakalawa.

Ayon kay Senior Inspector Lauro Milan, chief of police sa bayan ng Vintar, ang biktimang si Angelo Pascual ay isinakay ng kanyang mga tiyuhin na sina Marvin Pascual at Jeffrey Quelnat sa isang motorsiklo at inilagay nila sa kanilang gitna habang papunta sa karatig bayan ng Bacarra.

Gayonman, habang naglalakbay ay biglang nawalan ng kontrol sa motorsiklo at tumilapon ang sanggol sa irigasyon.

Sinabi ni Milan, dahil sa malakas na agos ng tubig at parehong nasa impluwensya ng alak sina Pascual at Quelnat ay hindi na nila nahabol ang bata.

Napag-alaman, tumulong ang ama ng bata na si Joel Pascual, sumusunod sa pinagsakyan sa kanyang anak nang maganap ang insidente, upang masagip ang sanggol.

Agad isinugod sa Gov. Roque Ablan Sr. Mem. Hospital sa Laoag City ang biktima ngunit idineklarang dead on arrival.

Sa ngayon, laking pagsisisi ng ama kung bakit hindi na lamang siya ang nagsakay sa kanyang anak.