Pumatay sa buntis na teenage bride itatapon sa dagat

GENERAL SANTOS CITY – Buhay rin ang kailangang ibayad ng mister na pumatay sa kanyang misis na tatlong buwan buntis.

Ito ang sinabi ni ni Adeb Udag, tribal chieftain ng tribung T’boli. Aniya, alam ng suspek na buntis na ang 16-anyos misis bago niya pinakasalan.

Naging tampok sa kanilang tribu ang pagsasauli ng dowry sa unang mister ng biktimang si Noraida Sugod, bago pinakasalan ng suspek na si Tonio Gumbe.

Dagdag ng Tribal chieftain, nagbigay ng baka at isang kabayo si Gumbe bago sila ikinasal.

Napag-alaman ding may diperensya sa pag-iisip ang suspek nang nangyari ang krimen.

Kung mahuhuli ang suspek, agad siyang ilalagay sa kahon, lalagyan ng bato at itatapon sa dagat, alinsunod sa batas ng kanilang tribu.

Isa rin sa ritwal na ginagawa ng kanilang tribu ay ang pagsasauli nang doble sa dowry sa mister kung sakaling hindi ipinaalam na buntis ang babae sa ibang lalaki.

Una rito, binaril ng improvised 12-gauge shotgun ni Gumbe ang 16-anyos misis, tatlong araw matapos ang kanilang kasal makaraan mag-away ang dalawa.