HATAW! D'yaryo ng Bayan hatawtabloid.com
LEGAZPI CITY – Hindi pa rin makausap ang 16-anyos dalagita makaraan ang masaklap na sinapit mula sa mga dumukot sa kanya sa lalawigan ng Sorsogon.
Sa salaysay ng mga saksi, huling nakita ang biktimang itinago lamang sa pangalang “Airee’’ sa isang computer shop at tinutukso ng ilang mga kalalakihan doon bago nangyari ang pagkawala.
Kinaumagahan, natagpuan na lamang ang biktima ng kanyang pinsan na nakahiga at nakatali ng masking tape ang mga paa, duguan at puno ng laslas ng razor blade ang mga braso malapit sa isang kapilya sa Brgy. Luneta, bayan ng Barcelona.
Napag-alaman, nagsimulang makatanggap ng bastos na mga text message si “Aireen” makaraang manalo sa school beauty pageant.
Nag-iwan pa ng banta ang mga suspek na isinulat sa kanang binti ng dalagita gamit ang pentel pen at nakasaad ang mga katagang “Warning pa lang ito, sa susunod ay patay na siya tulad ng nangyari sa rape slay victim na si teacher Roda Fortes ng Bulusan, Sorsogon.”
Dahil dito, hindi isinasantabi ng mga awtoridad ang anggulong pinagsamantalahan ang dalagita.
Sa ngayon, isinasailalim muna sa counselling ang biktima habang patuloy ang isinasagawang imbestigasyon ng mga awtoridad para sa pagkakakilanlan ng mga responsable sa krimen.
Beth Julian
