HATAW! D'yaryo ng Bayan hatawtabloid.com
PINAG-AARALAN ng Armed Force of the Philippines (AFP) ang pagsasampa ng kaso laban sa pamilya Laude, sa fiancé ni Jennifer na si Marc Sueselbeck at mga abogadong sina Harry Roque at Evangeline Suarez kaugnay sa illegal na pagpasok sa sa Mutual Defense Board-Security Engagement Board (MDB-SEB) facility sa Camp Aguinaldo noong Oktubre 22.
Kasunod ito ng posibilidad na ituring bilang illegal alien si Sueselbeck sa Filipinas dahil sa pagsampa sa perimeter fence ng MDB-SEB at pagtulak sa isang sundalo.
Ayon kay Lt. Col. Harold Cabunoc, hepe ng Armed Forces of the Philippines-Public Information Office (AFP-PIO), nilinlang sila ng kampo ng mga Laude.
Kwento niya, unang tinangka ng mga Laude na pumasok sa Gate 3 ng AFP sa Boni Serrano Ave. ngunit hindi sila pinahintulutan ng military police (MP) nang makita si Sueselbeck sa loob ng sasakyan.
Lumipat ang grupo sa Gate 6 at itinago ang Aleman saka binanggit sa MP na didiretso sila sa Public Affairs Office.
Ipinag-utos na ni Lt. Gen Gregogio Pio Catapang Jr., sa Judge Advocate General Service (JAGS) ng AFP na pag-aralan ang aksyon laban sa mga Laude at sa dalawang abogado.
Banggit ni Catapang, maaaring pumasok sa kampo ng bansa ang kahit sino ngunit dapat ay sumusunod sila sa regulasyon lalo na’t hindi karapatan ang pagpasok doon kundi isang pribilehiyo.
BI sumunod sa proseso vs fiance ni Laude (Pagtatanggol ng Palasyo)
SINUNOD lamang ng Bureau of Immigration ang proseso ng batas nang pigilan ang German fiancé ni Jeffrey ‘Jennifer’ Laude sa pagsakay sa eroplano pabalik sa kanyang bansa kamakalawa ng gabi.
Ayon kay Presidential Spokesman Edwin Lacierda, may inihaing reklamo ang Armed Forces of the Philippines (AFP) laban sa German fiancé ni Laude na si Marc Sueselbeck kaya’t ibinigay sa kanya ang order nang papaalis sana ng bansa sa Ninoy Aquino International Airport (NAIA) Terminal 1, upang kanyang sagutin.
Aniya, hindi makatuwiran na basta na lamang ideklarang persona non grata at malaman na lamang niya kalaunan na blacklisted na pala siya sa Filipinas, sakaling magbalik sa bansa.
Sinabi ni Lacierda, bahala na si Atty. Harry Roque na pabilisin ang proseso sa pagharap ni Sueselbeck sa kaso para makalabas na siya ng bansa.
Rose Novenario
