Sarili nabaril 7-anyos tigok

BAGUIO CITY – Patay ang 7-anyos batang lalaki nang aksidenteng mabaril ang sarili sa Km5, Pico, La Trinidad, Benguet kahapon ng umaga.

Kinilala ang biktimang si Cllezer Jones Mangoyao, estudyante ng Central Buyagan Elementary School, at residente sa naturang lugar.

Ayon kay S/Insp. Anderson Mauricio, chief investigator ng naturang kaso, isang paltik o homemade na baril paltog o single shot firearm na pag-aari ng nobyo ng ina ng biktima, ang nilaro ng bata at aksidenteng naiputok sa sarili.

Tumama ang bala ng paltik sa dibdib ng biktima at tumagos sa kanyang likod.

Sa salaysay ng ina ng biktima na si Leticia Mangoyao, pinaghahanda niya ang kanyang anak para pumasok sa paaralan ngunit ayaw ng paslit.

Habang nagsusuklay ay bigla na lamang nakarinig si Aling Leticia ng putok ng baril at nang tingnan ang kanyang anak ay nakahandusay sa sahig at duguan.

Agad dinala ang bata sa Benguet General Hospital ngunit idineklarang patay na.