Bangkay ng Aussie model itinapon sa tunnel

ISANG bangkay ng Australian model ang nakitang tadtad ng tama ng bala sa katawan sa Kayblang Tunnel road, Maragondon, Cavite, nitong Huwebes ng gabi.

Ayon kay S/Supt. Joselito Esquivel, Cavite Police Provincial Office (CPPO) director, ang bangkay ng biktimang si Brenton Trevon Metken, 58, ay nakita ng mga residente sa nasabing lugar.

Sa imbestigasyon ng pulisya, papunta sa Batangas ang biktima para sa isang engagement nang maganap ang brutal na pagpatay sa kanya.

“May posiblidad na pinatay ang biktima habang nasa byahe at itinapon ang katawan sa Cavite para iligaw ng mga salarin ang imbestigasyon,” pahayag ni Esquivel.

Napag-alaman na may tourist visa si Metken na inisyu noong Pebrero 14, na pansamantalang nanunuluyan sa isang apartment sa Ayala, Alabang, Muntinlupa City.

Sinabi ni Esquivel na bumuo siya ng grupo na tututok sa kaso upang matukoy ang motibo at pagkakakilanlan ng mga suspek.