HATAW! D'yaryo ng Bayan hatawtabloid.com
Mga Laro Ngayon (Araneta Coliseum)
12 nn – Opening ceremonies
2 pm – UE vs. UP
4 pm – La Salle vs. FEU
UUMPISAHAN ng La Salle Green Archers ang pagdedepensa sa korona sa salpukan nila ng Far Eastern University Tamaraws sa pagbubukas ng 77th University Athletic Association of the Philippines UAAP) men’s basketball tournament mamayang 4 pm sa Smart Araneta Coliseum sa Quezon City.
Sa unang laro sa ganap na 2 pm ay magkakasubukan ang host University of the East Red Warriors at University of the Philippines Fighting Maroons.
Nakakumpleto ng ‘Cinderella finish’ si coach Juno Sauler nang igiya niya ang Green Archers sa kampeonato noong nakaraang season.
Halos intact ang Green Archers at tanging ang point guard na si LA Tenorio ang nawala sa line-up at umakyat sa PBA.
Ang La Salle ay pamumunuan pa rin ng mga big men na sina Norberto Torres, Arnold Van Opstal at Yutien Andrada. Kabilang din sa mga inaasahan ni Sauler sina Jeron Teng, Jason Perkins at Almond Vosotros.
Ang FEU Tamaraws, na gagabayan din ni Nash Racela sa ikalawang season, ay sumasadig kina Anthony Hargrove, Roger Pogoy, Russel Escoto, Bryan Cruz at Reymark Belo.
Noong nakaraang season ay natalo ang Tamaraws sa Green Archers sa Final Four.
Ang UE Warriors ay gagabayan ngayon ng beteranong coach na si Derick Pumaren na humalili kay David Zamar.
Ang Red Warriors, na hindi umabot sa Final Four noong nakaraang season, ay patuloy na aasa sa foreigner na si Charles Mammie na susuportahan nina Roi Sumang at Gino Jumao-as.
Nangako naman si coach Rey Madrid na maiaahon niya ang Fighting Maroons na nangulelat noong nakaraang taon. Hinalinhan ni Madrid si Ricky Dandan bilang head cach ng UP sa huling tatlong games.
Magsisilbing main man ng Fighting Maroons ang dating Xavier High standout na si Kyles Jefferson Lao.
Bukas ay magkikita naman ang Adamson Falcons at Ateneo Blue Eagles sa Araneta Coliseum sa ganap na 2 pm. Susundan ito ng bakbakan sa pagitan ng National University Bulldogs at University of Santo Tomas Growling Tigers sa ganap na 4 pm.
