Misis na pipi utas kay mister na kapwa pipi (May iba umanong lover)

LAOAG CITY – Agad namatay ang isang piping misis makaraan saksakin ng asawa niyang isa rin pipi sa Brgy 9, San Nicolas, Ilocos Norte kamakalawa ng gabi.

Kinilala ang biktimang si Yvette dela Cruz, 29, habang ang suspek ay si Mark Neil dela Cruz, 28, kapwa residente ng nasabing barangay.

Ayon sa salaysay ni Macario dela Cruz, ama ni Mark Neil, nanonood siya ng programa sa telebisyon nang biglang marinig ang sigaw ng kanyang manugang na si Yvette sa bahay ng kanilang lola.

Agad siyang sumaklolo sa kanyang manugang at nang buksan ang pintuan ay tumambad sa kanya ang duguang si Yvette.

Nakita rin niya ang kanyang anak na si Mark Neil na may hawak na kutsilyo kaya’t sinubukan niyang agawin ang patalim dahilan upang masugatan din ang ama.

Ani Macario, nasabi sa kanya ng anak na may ibang lalaki ang kanyang asawa.

Nasa kustodiya na ng PNP San Nicolas ang suspek na isa rin pipi.