Kris Aquino sa Tarlac tatakbo (Artista ‘wag iboto?)

TIKOM ang bibig ng Palasyo sa political plan ni presidential sister Kris Aquino, napaulat na kakandidato bilang gobernador sa Tarlac at iba pang mamanukin ng administrasyon sa 2016 elections.

“ I’m not quite sure about the plans of the Presidential sister. I am also, at this point, not aware of any candidates that are being fielded by the President’s party in the 2016 elections,” ayon kay Deputy Presidential Spokesperson Abigail Valte.

Ang pahayag ay ginawa ng Palasyo makaraan umani ng batikos mula sa netizens ang panawagan ni Pangulong Benigno Aquino III sa publiko na huwag bumoto ng artista sa 2016 polls, samantala si Kris at ilang kaalyado ng administrasyon ay taga-showbiz.

Giit ni Valte, ang talumpati ni Pangulong Aquino ay hindi patungkol sa isang partikular na uri o grupo, bagkus ay ipinaalala lang sa mga botante na huwag sukatin ang kwalipikasyon ng kandidato sa husay lamang sa pagkanta, pagsayaw at pagbasa ng script.

“Hindi ito patama sa isang klase ng — sa isang grupo. Pero more of what the President was saying was that huwag lang ‘yon ‘yung tingnan natin at hindi lang dapat iyon ang kanilang kwalipikasyon kung sakaling merong tumakbo mula sa ganoong industriya,” ani Valte. (ROSE NOVENARIO)