Barangay official utas sa tambang

WALANG-awang pinagbabaril  hanggang mapatay ang isang 60-anyos opisyal ng barangay ng hindi nakilalang suspek habang naglalakad sa Caloocan City kamakalawa ng umaga.

Agad binawian ng buhay ang biktimang si Nida Geniebla, maintenance staff ng Brgy. 178, at residente #1335 San Isidro, Kiko Road, Camarin ng nasabing barangay, sanhi ng maraming tama ng bala ng hindi nabatid na kalibre ng baril sa iba’t ibang bahagi ng katawan.

Habang pinaghahanap ng pulisya ang hindi nakilalang suspek na naglakad lamang makaraan ang pamamaril.

Sa ulat ni PO3 Alcee Clemente Jumaquio, dakong 6:30 a.m. naglalakad ang biktima sa Kiko Road, Camarin patungo sa barangay hall nang sundan ng suspek saka pinagbabaril.

Hinihinalang politika ang motibo sa insidente dahil kaanak ng biktima ang isang barangay chairman na pinatay noong nakalipas na buwan sa nasabing lugar.

Sinasabing nagbanta ang mga kalaban nila sa politika na uubusin ang kanilang lahi.

(ROMMEL SALES)