SUGATAN ang 26 katao nang magkarambola ang apat na sasakyan sa kahabaan ng South Luzon Expressway (SLEX) sa nasasakupan ng Taguig City kamakalawa ng gabi.
Dinala sa Parañaque Doctors Hospital, Taguig-Peteros District Hospital at Medical City Hospital ang 26 biktimang pawang pasahero ng Cher Bus (TYM-473) at Toyota Hi-Ace Grandia (NOH-605).
Habang nasa kustodiya ng Highway Patrol Group (HPG-SLEX), ang driver ng Cher Bus na si George Caballero, nakatakdang sampahan ng kasong reckless imprudence resulting in multiple physical injuries and damage to property.
Base sa ulat ni SPO1 Marcelino Peralta ng HPG-SLEX, dakong 9:41 p.m. nang maganap ang insidente sa north bound lane ng SLEX, Taguig City.
Minamaneho ni Caballero ang Cher Bus at habang tinatahak ang naturang lugar, hindi nagawang makontrol ang preno dahilan upang sumampa sa gutter ng ilalim ng Skyway ang sasakyan at sinalpok ang Toyota Hi-Ace Grandia, dump truck (THL-368) at isang trailer truck (UUQ-332). (JAJA GARCIA)