Mag-aama, 1 suspek todas sa granada (4 sugatan)

BACOLOD CITY – Apat ang namatay kabilang ang dalawang bata, habang apat ang sugatan sa pagsabog ng granada sa lalawigan ng Negros Occidental.

Kinilala ang mga namatay na sina Karen Tangian, 11; Mary Michelle Tangian, 5, at ang kanilang ama na si Melvin Tangian, at si Dagul Domingo.

Habang patuloy na ginagamot sa Western Visayas Regional Hospital sa lungsod ng Bacolod ang mga sugatan na si Marilou Bustamante Tangian, 39, ina ng dalawang batang namatay, at iba pang mga anak na sina Kevin, 3; Rica, 8, at Melvin Jr., 10. Ayon kay punong barangay Ruby Libuna, nangyari ang insidente dakong 12 a.m. nang lasing na pumasok sa bahay ng pamilya Tangian ang suspek na si Domingo, kabilang sa mga namatay, habang dala ang isang granada.

Sa salaysay ni Marilou, nag-uusap ang kanyang asawa at si Domingo sa itaas ng kanilang bahay nang biglang may maghagis ng granada na agad sumabog.

Sinasabing tumalon si Domingo ngunit nahulog ang dala niyang granada dahilan upang sumabog din na naging dahilan ng kanyang pagkamatay.

(BETH JULIAN)