5 itinumba sa Fairview (Sa buong magdamag)

Lima ang kinompirmang patay sa serye ng magkakahiwalay na insidente ng pamamaril sa nakalipas na magdamag sa Fairview, QC.

Ayon sa pulisya, unang pinagbabaril ng mga nakamotorsiklong suspek ang isang lalaki na kinilalang si Rodelio dela Cruz, sa tapat ng tindahan ng car accessories at tabi ng isang apartelle sa Commonwealth Avenue, sakop ng North Fairview.

Ilang minuto makalipas, isa pang biktima ng pamamaril ang iniulat sa kanto ng Regalado Avenue at Bronx Street na kinilalang si Alodia Grace Go.

Dalawang biktima pa ng pamamaril ang tumambad sa hindi kalayuang tindahan ng salamin na kinilalang sina Jelmer Gabronino at Angelee Augit Soliva.

Ayon sa mga kaanak nina Soliva at Gabronino, inutusan lamang na bumili ng gamot ang mga biktima pero hindi na bumalik dahilan para hanapin nila ang mga kaanak.

Narekober sa apat na insidente na magkakasunod na pamamaril ang mga basyo ng .9mm kalibre ng baril.

Dakong 2:00 a.m. nang pagbabarilin ng ‘di pa tukoy na suspek ang isang basurero sa southbound ng Commonwealth sa bahagi ng Pearl Drive, sakop ng Barangay Greater Fairview, na mula sa kalibre .45mm baril ang balang ginamit sa pagpaslang sa biktima.

Inaalam ng Criminal Investigation and Detection Unit ng QC Police District (QCPD) ang pagkakakilanlan sa mga suspek sa unang apat na pamamaril at kung magkakaugnay ang pamamaslang.