HATAW! D'yaryo ng Bayan hatawtabloid.com
ni Ed de Leon
NATAWA naman kami sa isang internet survey na nakita namin, ang survey question ay kung sino ang pinakasikat na young male star sa kasalukuyan, at doon ay kasama ang pangalan ni Daniel Padilla at iba pang mga masasabi nating mga “second stringer” lang naman. Ang nakatatawa, isang “second stringer” ang lumalabas na pinakasikat sa kanilang survey. Sino ang maniniwala?
Iyang mga survey na ginagawa sa pamamagitan ng internet ay ni hindi mo puwedeng pagbasehan. Una, ang isang taong may interest sa sina-survey ay maaaring bumoto nang paulit-ulit. Maaari rin niyang sabihan ang kanyang mga kaibigan na iboto ang gusto nilang palabasing malakas sa survey. Iyong mga partido na hindi naman interesado sa survey, iyon ang maiiwan.
Magandang example nga iyang survey na nakita namin. Sino ang maniniwala na iyong “second stringer” na nangunguna sa kanilang survey ay mas sikat kaysa kay Daniel Padilla? Kumita na ba ang pelikula niyon na kagaya ng kinita ng pelikula ni Daniel? Iyon bang ginawang album niyon na kung nakikita namin sa Astrovision eh mukhang kinakapitan na ng alikabok ay masasabi mong nabibili kagaya ng CD ni Daniel? Iyon bang concert niyon na hindi naman sa Araneta kundi sa mga hotoy-hotoy lang na venue ay masasabi mong tinao?
Tapos ngayon lalabas sa survey mas sikat siya kaysa kay Daniel Padilla? Hindi ba nakatatawa iyon?
Iyong huling pelikula ni Daniel ay hindi nga naging isang napakalaking hit, dahil siguro nga hindi iyon ang tamang project para sa kanya. Ang bida naman kasi roon ay ang tiyuhin niya at ang tatay niya. Parang unfair naman iyong sinasabing kailangan ang popularidad niya ang magdala ng pelikula. Siguro kahit na iyong fans ni Daniel, kung manood man ng pelikulang iyon, hindi na uulit matapos na mapanood nang minsan. Hindi kasi sila talaga ang audience ng mga ganoong klaseng pelikula. Gusto nila iyong kikiligin sila. Hindi sila kikiligin kung ang mapapanood nila ay puro patayan.
Pero alalahanin ninyo, pelikula lamang ni Daniel Padilla ang nakipagsabayan sa pelikula ng mas malalaking stars noong film festival. Iyong iba, hindi umubra.
