Aldeguer pinarangalan ng PSC; bagong yugto ng PH football pinaiigting

FIFA Gianni Infantino Andres Aldeguer PSC Pato Gregorio

MULING nabuhay ang makasaysayang pamana ng pamilya Aldeguer sa Philippine football matapos kilalanin ng Philippine Sports Commission (PSC) ang batang pambansang manlalaro na si Andres Aldeguer, na naging susi sa makasaysayang panalo ng Pilipinas sa 2026 Asian Games sa Japan.

Si Andres ang nagbaon ng winning penalty kick sa 2-1 panalo ng Pilipinas kontra Kuwait, dahilan upang wakasan ang 68 taong paghihintay ng bansa para sa panalo sa men’s football sa Asian Games.

Mas naging makabuluhan ang tagumpay dahil kaparehong kasaysayan ang isinulat ng kanyang great-granduncle na si George Aldeguer noong 1958, nang umiskor ito ng winning goal sa 1-0 panalo ng Pilipinas kontra Japan.

Dahil dito, itinuring na pagpapatuloy ng isang pambihirang pamana sa sports ang tagumpay ni Andres, na inaasahang magiging isa sa mga mukha ng bagong henerasyon ng Philippine football.

Bilang pagkilala, nagsagawa ng parangal ang PSC at Philippine Football Federation (PFF) para kay Andres noong Nobyembre 13 sa Rizal Memorial Sports Complex.

Pinangunahan nina PSC Chairman John Patrick “Pato” Gregorio at PFF President John Anthony Gutierrez ang seremonya, kasama ang iba pang opisyal sa sports, si Migs Almeda at mga kaanak ng batang footballer.

Kasabay ng pagbibigay-pugay kay Andres, pinaigting din ng dalawang sports leader ang kanilang mga hakbang upang magkaroon ng mas matibay na pundasyon ang football sa bansa.

Nitong Nobyembre 15, lumagda sina Gregorio at Gutierrez kasama si FIFA President Gianni Infantino sa isang makasaysayang kasunduan para sa pagpapaunlad at pagsasaayos ng makasaysayang Rizal Memorial football stadium bilang world-class sporting venue.

Sa ilalim ng kasunduan, maglalaan ng pondo ang FIFA, ang PFF ang mangangasiwa sa implementasyon ng proyekto, habang magbibigay naman ng institutional at site support ang PSC.

Malaking tulong ang proyekto upang magkaroon ng mas maayos na pasilidad ang mga atletang Pilipino at mas mapalawak ang kanilang kakayahang makipagsabayan sa international competition.

Hindi lamang sa Metro Manila nakatuon ang pagpapalakas ng football. Sa pamumuno ni Gutierrez, patuloy na pinalalawak ng PFF ang nationwide football infrastructure program.

Kabilang sa mga lugar na nagkaroon ng bagong football pitches ngayong 2026 ang Balanga, Bataan; Tagum City, Davao del Norte; Leganes, Iloilo; Puerto Princesa, Palawan; at Isulan, Sultan Kudarat.

Kasunod nito ang mga nakatakdang proyekto sa Baguio City at Naga City sa tulong ng PSC, PFF at mga lokal na katuwang upang mas maraming kabataan ang magkaroon ng pagkakataong makapaglaro ng football.

Para kay Gregorio, mahalagang makalikha ng mas maraming atletang tulad ni Andres na kayang magdala ng karangalan sa bansa.

“We’ll have 100 more Andres,” pahayag ng PSC chairman, na nagpapakita ng kanyang determinasyong makapaglinang ng bagong henerasyon ng mga atletang Pilipino.

Samantala, patuloy namang itinutulak ni Gutierrez ang mga programa sa grassroots football, pagsasanay sa kabataan at coaches, gayundin ang mga regional competition upang matiyak ang tuluy-tuloy na pag-usbong ng football sa bansa.

Kaisa rin sa positibong pananaw si Almeda, na naniniwalang malaki ang potensiyal ng kasalukuyang henerasyon ng mga manlalaro.

“I think Andres, this group is the future,” ani Almeda, na binigyang-diin ang kahalagahan ng exposure sa international competition, de-kalidad na training at sapat na suporta.

Para sa Philippine football, hindi lamang personal na tagumpay ang naitala ni Andres kundi patunay rin na may kakayahan ang mga atletang Pinoy na gumawa ng kasaysayan kapag nabibigyan ng tamang oportunidad at suporta.

Mula sa makasaysayang goal ni George Aldeguer noong 1958 hanggang sa panalong penalty ni Andres makalipas ang 68 taon, muling nabuhay ang pag-asa para sa mas maliwanag na kinabukasan ng Philippine football.

Sa tulong ng PSC, PFF at FIFA, hangad na hindi na maging pambihirang tagumpay lamang ang ganitong mga sandali kundi simula ng mas matatag at matagumpay na tradisyon ng football sa Pilipinas. (PSC/HNT)