DIAMNIADIO — Handa nang sumabak sa laban para sa medalya si Maritanya Krog matapos subukan ang ruta ng women’s road race sa cycling nitong Sabado sa 2026 Dakar Youth Olympic Games (YOG).
Kasabay ni Krog, sasabak din sa Linggo si Tchelzy Maayo sa women’s individual all-around ng artistic gymnastics.
Nauna nang nagpakitang-gilas si Hillarion Palles III sa men’s individual all-around qualification nitong Sabado, bagama’t aminado ang kanilang coach na mahirap para sa Pilipinas na makasungkit ng medalya sa gymnastics.
Ayon kay coach Reyland Capellan, dehado ang Pilipinas dahil dalawa lamang ang puwedeng isabak ng bansa sa YOG at limitado rin ang mga event sa team at individual all-around.
“Wala na kaming pagkakataon sa team gold. Mahirap ding makapasok sa podium sa all-around dahil kailangan mong maging mahusay sa halos lahat ng apparatus,” paliwanag ni Capellan sa POC Media Pool.
Dating gold medalist sa floor exercise sa 2015 Singapore at 2017 Malaysia Southeast Asian Games si Capellan. Nagsimula siyang maging coach ng national team noong 2019 Philippine SEA Games.
Paborito namang mangibabaw ang Japan at China na kapwa may kumpletong koponan sa kompetisyon.
Ayon kay Capellan, malakas si Palles sa vault at high bar habang floor exercise at vault naman ang pangunahing event ni Maayo.
Noong Hunyo, muntik nang makasungkit ng bronze medal si Maayo matapos kapusin ng isang puntos sa Asian Junior Championships sa Zunyi, China.
Gayunman, positibo pa rin ang pananaw ni Maayo sa kanyang kampanya.
“Masaya ako sa mga nangyayari habang sinusubukan kong manatiling nakatutok. Ibibigay ko ang aking makakaya, may medalya man o wala,” pahayag ni Maayo.
Samantala, unang sinubukan ni Krog at ng iba pang siklista ang 8.50-kilometrong halos patag na ruta sa Corniche, na may tanawin ng Atlantic Ocean.
Ayon kay coach Mark John Lexer Galedo, malaking hamon ang hangin at init sa karera, bagama’t sanay naman si Krog sa mainit na panahon sa kanilang lugar.
Tinutulungan siya ni national coach Marita Lucas sa paghahanda.
Susunod na sasabak si Naomi Caesar sa women’s 800 meters athletics sa Lunes sa Complexe Iba Mar Diop sa Dakar.
Babalik naman si Krog sa Corniche sa Martes para sa individual time trial habang sasabak si Pi Wangkay sa men’s 200 meters.
Si Jade Justiniane ang huling atleta ng Pilipinas na magsisimula ng kampanya sa windsurfing sa Miyerkules sa Saly Beach West. (POC Media Pool/HNT)
