ORMOC CITY — Unti-unting pinatitibay ng Ormoc City ang pangalan nito bilang sentro ng pagsasanay ng mga atleta sa rehiyon at posibleng maging pangunahing destinasyon ng sports tourism sa bansa.
Sa pangunguna nina Mayor Lucy Torres-Gomez at Leyte 4th District Rep. Richard Gomez, katuwang ang Philippine Sports Commission (PSC), patuloy na nagtatayo at nagpapahusay ng mga pasilidad na magagamit ng mga atleta at ng buong komunidad.
Binigyang-diin ni PSC Chairman Patrick Gregorio ang potensiyal ng Ormoc sa pagdiriwang ng ika-79 Charter Day ng lungsod, kung saan nakaharap niya ang 1,500 tourism officers mula sa iba’t ibang panig ng bansa.
Ayon kay Gregorio, may malaking potensiyal ang Ormoc na maging sentro ng sports tourism dahil bukod sa magagandang pasyalan, kaya rin nitong mag-host ng malalaking paligsahan.
Ibinahagi rin niya ang tagumpay ng Thailand, Vietnam, South Korea at Poland sa pagsusulong ng sports tourism. Aniya, ginagamit ng mga bansang ito ang malalaking sporting event upang makahikayat ng mga turista at mas makilala ang kanilang mga lugar.
Kabilang sa mga pasilidad na naitayo at patuloy na ginagawa sa Ormoc ang training center para sa modern pentathlon, boxing gym, obstacle course, wall-climbing facility, BMX track, fencing gym, skateboarding park, karate at martial arts gym, track oval at pasilidad para sa rowing sa Lake Danao.
Nagkaloob din ang PSC ng mga bangka at nagtalaga ng mga coach mula sa national team upang makatulong sa pagpapalaganap ng rowing sa lungsod.
Hindi lamang para sa mga piling atleta ang mga pasilidad na ito. Layunin ding gamitin ang mga ito sa pagsasanay ng kabataan at pagdaraos ng mga torneo na maaaring makaakit ng mas maraming turista at bisita sa Ormoc.
Nagpasalamat naman si Mayor Lucy sa suporta ng PSC at sinabing nais ng lungsod na makinabang ang lahat sa mga proyektong pang-isports.
Ayon sa alkalde, hindi lamang mga atleta ang makikinabang sa mga pasilidad kundi pati mga pamilya, residente at turistang bibisita sa lungsod.
Bahagi ng isang buwang pagdiriwang ng Charter Day ang pagbubukas ng obstacle course at wall-climbing facility, gayundin ang pagpapakilala sa bagong multi-level dormitory na kayang tumanggap ng hindi bababa sa 120 atleta. Matatagpuan ang mga ito malapit sa track oval at sports complex.
Ayon kay Richard Gomez, na pangulo rin ng Philippine Modern Pentathlon Association at second vice president ng Philippine Olympic Committee, bahagi ito ng plano na gawing sentro ng pagsasanay sa rehiyon ang Ormoc upang makapaghanda ang mga atleta para sa mga pambansa at pandaigdigang kompetisyon.
Suportado rin ng mga national sports association ang hakbang ng lungsod. Pinuri ni Karate Pilipinas President Ricky Lim ang plano nitong magtayo ng sariling pasilidad para sa karate at nagkaloob siya ng mga bagong banig na gagamitin sa pagsasanay.
Nangako rin si Lim na dadalhin sa Ormoc ang mga miyembro ng national team upang magsanay at magturo ng karate sa mga kabataan nang walang bayad.
Sa ganitong paraan, hindi lamang mga pasilidad ang maiiwan sa lungsod kundi pati kaalaman at oportunidad para sa susunod na henerasyon ng mga atleta.
Tiniyak naman ni Gregorio na patuloy na susuportahan ng PSC ang mga plano ng Ormoc na palakasin ang sports development at turismo.
Sa patuloy na pagdaragdag ng mga pasilidad at pakikipagtulungan sa mga asosasyong pang-isports, target ng Ormoc na makahikayat ng mas maraming atleta, torneo at turista, at maging isa sa mga kinikilalang sentro ng sports tourism sa Pilipinas. (PSC/HNT)
