IBINIYAHE na sa New Quezon City Jail Male Dormitory sa Payatas si dating House Speaker Martin Romualdez.
Ito ay matapos masuri at ideklara ng mga doktor mula sa Philippine General Hospital (PGH) na hindi kailangan ni Romualdez ng hospital confinement.
Mula sa PGH sa Taft Avenue, Ermita, Maynila, ibiniyahe si Romualdez patungong QC Jail dakong 10:09 ng gabi nitong Lunes.
Nahaharap si Romualdez sa P7.4 bilyong plunder dahil sa maanomalyang flood control projects.
Ayon kay PGH Director Dr. Gerardo “Gap” Legaspi, “clinically stable” si Romualdez at malabong makaranas ng emergency medical condition.
Sinabi ni Dr. Henry Fabro, chief medical officer ng Quezon City Jail Male Dormitory, sapat ang kanilang pasilidad sa medical needs ni Romualdez.
Ayon kay Fabro, maaaring regular na gamitin ni Romualdez ang CPAP machine, gamot, at maaaring konsultahin ng kanyang pribadong doktor sa loob ng kulungan.
Maaari rin ilipat si Romualdez sa mga kalapit na ospital sakaling mayroong emergency.
Itinakda ng Sandiganbayan Third Division ang arraignment at pre-trial ni Romualdez 8:30 ng umaga ngayong araw, Miyerkoles, 16 Setyembre 2026.
Matapos maibiyahe sa QC Jail, inilabas sa publiko ng Department of the Interior and Local Government (DILG) ang mugshots ni Romualdez. (HNT)
