PHL sasabak sa AVC Girls’ U18 Championship sa Thailand
NAKATAKDANG sumabak ang Pilipinas sa Asian Volleyball Confederation (AVC) Girls’ U18 Championship na magsisimula ngayong Miyerkules sa Nakhon Ratchasima, Thailand.
Unang makakaharap ng Filipinas ang kampeon ng 2025 Asian Youth U19 na Iran, susundan ng Japan sa Hulyo 2 at Indonesia sa Hulyo 3.
“May talento ang mga manlalaro namin, kailangan lang nilang higit pang mapataas ang antas ng kanilang laro,” pahayag ni head coach Rey Karl Dimaculangan, katuwang sina assistant coaches Keenan Quitco at Marco Ely Maclang.
Pangungunahan nina Xyz Ellen Rayco at Ma. Ellanie Lorraine Gonzalvo ang koponan na bagong salta mula sa pagwawagi ng tansong medalya sa Princess Cup, na pinagkampeunan ng Thailand dalawang araw na ang nakalipas.
Kabilang din sa pambansang koponan sina Sharina Rhayza Lleses, Frances Dianne Ramos, Micaella Gould, Irish May Mahinay, Venus Anne De Guia, Ghenievib Belen, Ysabelle Patricia Cruz, Slash Nicole Obera, Maria Ysabelle Tuballas, Princess Khaira Manzano, Jhaynna Love Bulandres at Adelaine Terese Agustin.
Karamihan sa mga manlalaro ay bahagi ng koponan ng National University na nagkampeon sa 2026 Palarong Pambansa. Naglalaro naman si Lleses para sa King’s Montessori ng Quezon City, habang kabilang si Gonzalvo sa Adamson Baby Falcons.
Kasama sa Pool A ang Thailand, Uzbekistan, Australia at Mongolia. Binubuo naman ng China, Kazakhstan, Hong Kong at Kyrgyzstan ang Pool B, habang nasa Pool D ang Chinese Taipei, Korea, India at ang silver medalist ng 2026 Princess Cup na Vietnam. (POC/HNT)
