John Lloyd at Ellen bibida sa isang sitcom sa GMA

MA at PA
ni Rommel Placente

IBINALITA ni Bayani Agbayani sa isang interview, na may gagawin siyang sitcom na pagbibidahan ng  ex-celebrity couple na sina John Lloyd Cruz at Ellen Adarna. Makakasama rin nila si Rufa Mae Quinto.

Kuwento pa ni Bayani, mapapanood ang sitcom sa GMA 7 pero wala pa siyang idea kung kailan magsisimula ang taping. 

Aniya, uunahin muna ng Kapuso Network ang isa pa nilang sitcom.

“Kasi pala, ang patakaran ngayon, ipinalalabas muna sa streaming platform, sa Prime Video o sa Netflix, bago ilagay sa TV,” sabi ni Bayani sa nasabing panayam.

“Kahit ‘yung mga soap, eh. Ilalabas muna roon. Siguro, mas may kita. Pampadagdag doon sa ipo-produce,” aniya pa.

Ipinagmamalaki pa ni Bayani na si John Lloyd  mismo ang pumili sa kanya para mapasama sa sitcom. Ito kasi ang line-producer.

“Matagal ko nang kaibigan si Lloydie. Nagkasama kami sa TFC, sa abroad. Nag-guest ako dati sa kanila sa ‘Home Sweetie Home.’

“Tapos kami na ‘yung naging mainstay, ‘di ba? Kami nina Vhong Navarro, Toni (Gonzaga), Alex (Gonzaga),” saad pa ng veteran comedian.

“Alam mo, nakatutuwa, ang sabi sa akin niyong producer at saka niyong writer, maraming-maraming salamat, Lloydie, kasi talagang napakabait niyong tao.

“Sabi niya, ‘Hindi ko ito gagawin kung wala si Bayani at si Rufa Mae Quinto.’ Kaya sabi ko sa kanya, ‘Sige, sasamahan kita. Tutulungan kita. Tulong-tulong tayo!’” lahad pa niya.

Nag-line produce at nagbida na rin si John Lloyd sa sitcom ng GMA 7 na Happy ToGether, na ipinalabas noong December, 2021.