HATAW! D'yaryo ng Bayan hatawtabloid.com
LALO pang mapapalakas ang lokal na sports tourism sa pagdaraos ng ika-11 Asia-Oceania Sambo Championships na inihahatid ng Philippine Sports Commission (PSC) sa ilalim ng National Sports Tourism Inter-Agency Committee (NST-IAC), na nakatakdang buksan sa Hunyo 23 sa Ninoy Aquino Stadium.
Ayon kay Pilipinas Sambo Federation Inc. president Paolo Tancontian, inaasahan nilang lalampas sa unang target na 500 atleta ang bilang ng mga kalahok sa torneo.
“Inaasahan lamang namin noon ang humigit-kumulang 500 atleta, subalit patuloy pang tumataas ang bilang dahil nasa 400 na agad ang nakapagpatala sa kasalukuyan. Posibleng umabot sa mahigit 600 grapplers mula sa 31 bansa ang lumahok,” ani Tancontian.
Sinabi rin ni Tancontian na ang karatig-bansang Cambodia, na may lumalawak na komunidad ng sambo, ay magpapadala ng 42 miyembrong koponan upang makibahagi sa limang araw na torneo na kinikilala ng International Sambo Federation (FIAS).
“Maaaring maliit ang bilang na ito kung ihahambing sa mga team sports, ngunit para sa sambo ay napakarami na nito,” dagdag niya.
Ibinunyag din niya na maging ang mga bansang Uzbekistan, Kyrgyzstan, Kazakhstan, Iran at Syria, gayundin ang mga bansang Oceania tulad ng Australia at New Zealand, ay nagpahayag ng matinding interes na lumahok sa prestihiyosong torneo.
Dagdag pa ni Tancontian, kung hindi lamang dahil sa umiiral na tensyon sa Gitnang Silangan, inaasahan sana nilang lahat ng 36 bansang kasapi ng Sambo Union of Asia and Oceania ay magpapadala ng kani-kanilang delegasyon.
“Kung umabot tayo sa 31 bansang kalahok, malaking tagumpay na ito para sa atin,” aniya.
Samantala, sinabi ni PSC chairman Patrick “Pato” Gregorio na ang positibong pag-unlad na ito ay patunay na epektibo ang pagsusulong ng ahensya sa sports tourism bilang mahalagang bahagi ng pambansang ekonomiya.
“Ang pagho-host ng isang organisado at internasyonal na kompetisyon tulad ng nalalapit na ika-11 Asia-Oceania Sambo Championships ay isang makabuluhang hakbang na nakalilikha ng kita para sa pamahalaan at industriya ng turismo,” pahayag ni Gregorio.
“Ang mga ganitong sporting events ay tunay na kapaki-pakinabang para sa lahat — sa mga dayuhang bisita, tagahanga, at iba’t ibang sektor na kabahagi sa pagdaraos nito,” dagdag niya.
Binigyang-diin din ng PSC chief na malaking tulong ang Administrative Order No. 38 na nilagdaan ni Pangulong Ferdinand “Bongbong” Marcos Jr. noong Oktubre, na nagtatag sa National Sports Tourism Inter-Agency Committee (NST-IAC).
“Sa bawat pagdaraos ng mga internasyonal na kompetisyon sa ating bansa, nagbibigay ang NST-IAC ng wastong gabay at balangkas upang higit na mapatingkad ang mga sports at tourism showcase at makalikha ng pangmatagalang positibong alaala,” ani Gregorio, na siya ring namumuno sa komite.
Dagdag pa niya, mahalagang bahagi rin ng mga naturang aktibidad ang pagpapakilala sa mga dayuhang bisita ng natatanging Filipino hospitality na kinikilala sa buong mundo.
“Naitatag na natin ang epektibong sistema at pamantayan sa matagumpay na pagdaraos ng mga internasyonal na torneo sa bansa, at patuloy natin itong pinauunlad upang higit pang mapabuti ang mga susunod na kompetisyon,” aniya.
“Mas maayos, episyente at organisado na ngayon ang koordinasyon sa pagitan ng mga ahensya ng pamahalaan, National Sports Associations at pribadong sektor na katuwang sa mga proyektong ito,” pagtatapos ni Gregorio. (PSC/HNT)
