Bigtime pusher ng Pampanga nakorner
P6.8-M shabu nasamsam sa Parañaque

ISANG lalaking pinaniniwalaang bigtime na tulak ng droga sa Pampanga ang naaresto ng mga tauhan ng Philippine Drug Enforcement Agency (PDEA) sa ikinasang buybust operation sa Brgy. Don Bosco, lungsod ng Parañaque, dakong 7:00 ng gabi nitong Sabado, 9 Mayo.

Kinilala ang suspek na si alyas Anton, 44 anyos, tubong-Pampanga, at sinasabing sangkot sa malawakang pagpapakalat ng droga sa Metro Manila, Pampanga at karatig-lalawigan.

Matapos maaresto ang suspek, nakumpiska mula sa kaniya ang dalawang piraso ng resealable transparent plastic bags na naglalaman ng humigit-kumulang 1,000 gramo ng shabu na tinatayang nagkakahalagang P6,800,000.

Narekober din mula sa pag-iingat ni alyas Anton ang isang cellphonr, isang digital weighing scale, at ang marked money na ginamit ng undercover agent.

Sa naging pahayag ng pinuno ng PDEA, “Si Anton ay tubong Pampanga at dating nakakulong dahil sa mga kaso ng droga. Inabot ng tatlong linggo ang aming mga operatiba bago siya napagkasunduan ng isang transaksyon sa droga.”

Pansamantalang ikukulong ang suspek sa pasilidad ng PDEA-3, habang ang mga nakumpiskang ilegal na droga ay sasailalim sa qualitative at quantitative analysis sa kanilang laboratoryo .

Ang operasyon ay isinagawa sa pamamagitan ng pakikipagtulungan ng PDEA RO3; Special Enforcement Team, PDEA NCR-Southern District Office, at PNP Drug Enforcement Group.

Inihahanda na ang mga kasong paglabag sa Section 5 (Sale of Dangerous Drugs) ng RA 9165 para sa pagsasampa sa korte laban sa suspek. (MICKA BAUTISTA)