Sa Pampanga
Ilegal na pagawaan ng toyo sinalakay ng CIDG-3

SINALAKAY ng mga tauhan ng Criminal Investigation and Detection Group (CIDG-3) sa pamamagitan ng isinilbing search warrant ang isang ilegal pagawaan ng toyo sa Brgy. Sta. Lucia, lungsod ng San Fernando, lalawigan ng Pampanga.

Sa ulat ni P/Lt. Col. Marlon Cudal kay CIDG-3 Regional Chief P/Col. Grant Gollod, kinilala ang nadakip na suspek na si alyas Aldo, nasa hustong gulang at residente sa nabanggit na lugar.

Ayon sa paunang imbestigasyon, lumabag sa Section 10a (ilegal na operasyon) ng RA 9711 o Food and Drug Administration Act of 2009.

Nakumpiska mula sa pabrika ang mga processing equipment, storage tanks, filter at carboy, machines, steam boilers, 25 container ng finished concentrated soya extract, at toyo na tinatayang nagkakahalaga ng P30,000,000.

Kasalukuyang nakadetine ang suspek sa CIDG detention facility para sa iba’t ibang kaso habang nagpapatuloy ang imbestigasyon. (MICKA BAUTISTA)