Sa Payatas
Laborer utas sa saksak

BINAWIAN ng buhay ang isang construction worker matapos patraidor na saksakin sa Brgy. Payatas, lungsod Quezon nitong Linggo ng gabi, 26 Abril.

Kinilala ang biktimang si Michael Bryan Napoles, 29 anyos, residente sa Lupang Pangako, sa nabanggit na barangay, at idineklarang dead on arrival nang isugod sa Rosario Maclang Hospital matapos ang insidente.

Sa ulat mula sa Criminal Investigation and Detection Unit – QCPD, dakong 10:50 ng gabi kamakalawa nang maganap ang krimen sa naturang lugar.

Nabatid na tinutulungan ng biktima ang kanyang tiyuhin na kinilalang sisi alyas Richard na itulak ang kaniyang motorsiklo nang biglang sumulpot ang mga suspek na magkaangkas sa motorsiklo.

Bumaba sa motorsiklo ang isa sa mga suspek na nakasuot ng asul na jacket saka sinaksak sa likod ang biktima.

Matapos maisakatuparan ang krimen, agad tumakas ang mga suspek sakay ng asul na motorsiklong Honda Click.

Patuloy na nagsasagawa ng imbestigasyon ng pulisya upang matukoy ang motibo ng krimen at ang pagkakakilanlan ng mga suspek na nananatiling nakalalaya.