HATAW! D'yaryo ng Bayan hatawtabloid.com
TARGET ng Southern Police District (SPD) ang dalawang lalaking ‘bida’ sa isang viral video na bumutas ng gulong at namukpok ng baril sa salamin ng isang Nissan Navara sa Taguig-Makati area, nitong Biyernes, 24 Abril.
Matukoy ng SPD ang isa sa dalawang suspek habang inaalam pa ang pagkakakilanlan ng isa, na kapwa ipatatawag para imbestigahan dahil sa nakitang paglabag sa umiiral na batas.
Kahit nagkaroon ng amicable settlement ang mga nabanggang sasakyan ng driver ng Nissan Navara at hindi na naghain pa ng reklamo, kinakailangan pa rin magpaliwanag ang dalawang suspek.
Ayon kay SPD Acting Director PCol. Glenn Oliver Cinco, hinabol ng dalawang naka-helmet ang driver ng Nissan Navara na tumakas matapos banggain ang isang Toyota Corona na sumalpok naman sa isang motorsiklo sa Chino Roces Avenue, Brgy. Fort Bonifacio, Taguig noong Biyernes gabi, 24 Abril 2026.
Inabutan ng dalawa ang tumakas na driver nang makabangga ng isa pang sasakyan sa Chino Roces Avenue Extension malapit sa Alphaland, Brgy. Magallanes sa Makati City kung saan naispatan ang pamumukpok ng baril sa salamin ng sasakyan at pagbutas sa dalawang gulong na nakunan ng video ng isang motorista.
Inilinaw ni Makati City PCol. Pedro Alagano, Jr., multiple vehicle collision at hindi road rage o robbery ang nasabing insidente. Naganap ito dakong 7:00 ng gabi malapit sa gasoline station sa Chino Roces Avenue sa Brgy. Fort Bonifacio, Taguig City.
Sinabing paliko sa kaliwa kaya bumagal umano ang isang sedan na nabangga ng Nissan Navara ang likurang bahagi, dahilan upang umusad at mabangga ang motorsiklo sa kabilang lane.
Nasugatan ang sakay ng motorsiklo habang tumakas ang pick-up ngunit pagsapit sa Chino Roces Extension sa Brgy. Magallanes ay muling bumangga sa isa pang sasakyan.
Sa kabila nito, nagkasundo ang bawat panig sa isyu ng banggaan, habang patuloy sa pagtukoy sa isa pang suspek. (NIÑO ACLAN)
