Nagulungan ng 2 truck na kargado ng buhangin lady rider todas sa Ortigas

PATAY ang isang 31-anyos babaeng rider nang magulungan ng isang 12-wheeler truck at isang dump truck sa Ortigas Flyover Southbound patungo sa direksiyon ng Meralco Avenue, sa lungsod ng Pasig, nitong Lunes ng gabi, 27 Abril.

Pahayag ng driver ng 12-wheeler truck na may kargang buhangin, binabagtas niya ang kalsadang patungong Pasig mula Pampanga, nang makarinig siya ng kalabog.

Nang huminto at bumaba, agad niyang nakita ang nagulungang rider na wala nang buhay.

Paglipas nang ilang oras habang nakahinto ang 12-wheeler truck at naghihintay ng SOCO, muling nasagasaan ang biktima ng isang dump truck.

Ayon sa 29-anyos driver ng dump truck, biglang huminto ang sinusundan niyang SUV paakyat ng flyover.

Nabangga niya ang SUV at nang kumabig pakanan nahagip ang nakahandusay na rider.

Nabatid na may karga rin buhangin ang dump truck na papuntang Teresa, Rizal at galing din sa Pampanga.

Kasalukuyang nasa kustodiya ng Mandaluyong CPS ang dalawang driver habang patuloy na nagsasagawa ng imbestigasyon ang mga awtoridad. (HNT)