4 Chinese, dinakip sa pagmaltrato ng kasambahay

ISANG Pinay na namamasukangkasambahay ang sinagip ng mga awtoridad sa isinagawa nilang rescue operation laban sa kamay ng apat nitong amo, pawang Chinese national, na nagkukulong sa kanya sa isang bahay sa Pasay City.

Hindi pinangalanan ang apat na suspek at ang 43-anyos na babae ni PNP chief Gen. Jose Melencio Nartatez, Jr., na nasagip sa isang rescue operation sa isang residential unit sa F.B. Harrison St., Barangay 13.

Sa ulat, dakong 12:15 ng tanghali nang pasukin ng mga pulis ang bahay ng mga dayuhan matapos makatanggap ng tip mula sa isang concerned citizen.

Isinumbong ng concerned citizen na ayaw palabasin ng mga suspek sa kanilang unit ang biktima.

Nakita ng mga pulis sa loob ng unit ang biktima kasama ang mga suspek kaya’t agad na inaresto.

Nabatid na simula noong 2023 nagtatrabaho ang biktima sa mga suspek hanggang dalhin sa kanilang unit sa Pasay City kung saan nakaranas nang pagmamaltrato.

Nasa kustodiya na ng pulisya ang apat na dayuhan at isinailalim sa masusing imbestigasyon.