Sa Lebanon
AMO NG PINASLANG NA 2 OFWs TINIYAK NA PANANAGUTIN

NANGAKO ang Department of Migrant Workers (DMW) na titiyakin ng Migrant Workers Office (MWO) na masampahan ng kaso ang employer na pumaslang sa dalawang overseas Filipino workers (OFWs) nitong 15 Abril 2026 sa Lebanon.

Ang dalawang biktima, parehong matagal nang nagtatrabaho bilang household service worker sa nasabing tahanan, ay binaril noong 15 Abril, sa isang hostage-taking, ulat ng DMW.

Sinabi ng ahensiya na ang amo ay naaresto na at nananatili sa kustodiya ng pulisya habang hinihintay ang pormal na pagsasampa ng kaso.

Sinabi ng ahensiya na bibisitahin ng mga undersecretary ng DMW ang mga pamilya ng mga biktima sa Martes upang magpaabot ng pakikiramay at tiyakin ang buong suporta ng gobyerno.

“Ang Migrant Workers Office (MWO), kasama ang Embahada ng Pilipinas sa Lebanon, ay nakikipag-ugnayan sa mga lokal na awtoridad upang matiyak ang isang masusing imbestigasyon at ang pagsasampa ng mga naaangkop na kaso,” pahayag ng DMW.

Dagdag ng ahensiya, nanatiling nakatuon ang gobyerno ng Filipinas sa pagtitiyak ng hustisya para sa mga biktima at pagbibigay ng patuloy na tulong sa kanilang mga pamilya, kabilang ang pagpapauwi at mga benepisyo. (NIÑO ACLAN)