NASAKOTE ang limang Vietnamese nationals na pinaniniwalaang sangkot sa bentahan online ng processed dog meat sa operasyong magkatuwang na ikinasa ng National Bureau of Investigation (NBI) at National Meat Inspection Service (NMIS), sa mga lungsod ng Makati at Pasay nitong Martes, 10 Marso.
Bukod sa pagdakip sa mga suspek, ipinasara ng mga awtoridad ang kanilang plantang hindi rehistrado at walang permit, habang patuloy na iimbestigahan upang matukoy ang iba pang mga sangkot sa ilegal na operasyon.
Isinagawa ang operasyon matapos makatanggap ng impormasyon na ibinebenta sa mga online platform ang ‘hot meat’.
Agad nagkasa ng test-buy operation at sa ikalawang pagkakataon ay nakabili ang poseur buyer na sinundan ng pagdakip sa delivery rider na nagturo sa meat processing site sa lungsod ng Makati.
Nagsagawa ng species verification at kinompirma ng NMIS laboratory, gamit ang Polymerase Chain Reaction (PCR) na ang mga sample ay kompirmadong karne ng aso, dahilan upang tuluyang dakpin ang mga banyaga.
Ayon sa lokal na pamahalaan ng Makati, hindi agad natuklasan ang ilegal na gawain ng mga suspek dahil hindi sila nakarehistro bilang food establishment.
