HATAW! D'yaryo ng Bayan hatawtabloid.com
PINAL na ng East Asia Super League (EASL) ang anim na koponan na maglalaban sa EASL Finals na gaganapin mula Marso 18 hanggang 22 sa Macau SAR, kung saan kokoronahan ang susunod na kampeon ng Asya.
Matapos ang pinalawak na 36-larong regular season na nilahukan ng 12 koponan mula sa tatlong grupo, anim na lamang ang natira para sa pinakamalaking postseason playoff sa kasaysayan ng liga. Ikalawang sunod na taon na magho-host ang Macau ng postseason ng liga, mula sa Final Four noong 2024-25 hanggang sa mas pinalawak na Finals ngayong season.
Malaki rin ang itinaas ng premyo. Tatanggap ng USD 1.5 milyon ang kampeon, USD 750,000 ang runner-up, at USD 350,000 ang magtatapos sa ikatlong puwesto — ang pinakamalaking gantimpala sa kasaysayan ng EASL.
Binibigyang-halaga ng format ng EASL Finals ang performance sa regular season. Ang dalawang nanguna sa kanilang grupo ay direktang aabante sa semifinals, habang ang ikatlong group winner at ang tatlong second-place teams ay magsisimula sa quarterfinals. Dinisenyo ang bracket upang magkatagpo lamang sa championship game ang mga koponang mula sa parehong grupo, para masiguro ang sariwa at kapana-panabik na mga laban sa buong torneo.
Magsisimula ang quarterfinals sa Marso 18, susundan ng semifinals sa Marso 20, at magtatapos ang Finals sa Marso 22 sa pamamagitan ng third-place game at championship game. Ia-anunsyo pa ang venue ng quarterfinals, habang ang semifinals at finals sa Marso 20 at 22 ay gaganapin sa Studio City Event Center.
Magiging available ang mga tiket para sa EASL Finals simula Pebrero 26 sa pamamagitan ng opisyal na ticketing partner ng liga na TicketLink. Iaanunsyo pa ang karagdagang detalye sa lalong madaling panahon.
“Ngayong bumalik na ang postseason at narito na ang EASL Finals, nakahanda na ang entablado para sa pinakamataas na antas ng kompetisyon na ating nasaksihan,” ani EASL Chief Executive Officer Henry Kerins. “Anim na koponan ang natitira, bawat isa’y kumakatawan sa lakas at lalim ng basketball sa rehiyon, na maglalaban para sa pinakamalaking prize pool sa kasaysayan ng liga. Nasasabik kaming bumalik sa entabladong ito at koronahan ang kampeon ng Asya.”
Narito ang anim na koponan na maglalaban sa EASL Finals sa Macau:
GROUP A
No. 1 seed: Utsunomiya Brex (B.LEAGUE) 4-2
Naselyuhan ng Utsunomiya Brex ang kanilang puwesto sa EASL Finals sa huling araw ng regular season matapos talunin ang Taipei Fubon Braves, 105-88, noong Pebrero 11, at tapusin ang kampanya sa tatlong sunod na panalo. Nakabawi rin sila mula sa 109-107 overtime loss laban sa Taipei noong Oktubre 8 sa EASL Tip Off 2025. Nagtapos ang Brex na may 4-2 record at nakuha ang top seed sa Group A laban sa Seoul SK sa pamamagitan ng head-to-head point differential. Ang una nilang makakalaban sa EASL Finals ay ang New Taipei Kings ng Group C.
No. 2 seed: Seoul SK Knights (KBL) 4-2
Nakapasok ang Seoul SK Knights sa EASL Finals matapos talunin ang Taipei Fubon Braves, 89-78, noong Enero 28, at naging unang koponan na nakaseguro ng postseason berth. Umangat sila sa 4-2 record, at dahil sa pagkatalo ng Braves, natiyak ang kanilang pag-advance anuman ang maging resulta ng iba pang laro. Ikalawa nila itong postseason appearance matapos makarating sa Final Four noong inaugural 2023-24 season. Matapos hatiin ang kanilang unang dalawang laro, sunod-sunod silang nanalo at tinapos ang Group A sa 4-2. Ang una nilang makakalaban ay ang Taoyuan Pauian Pilots ng Group B.
GROUP B
No. 1 seed: Ryukyu Golden Kings (B.LEAGUE) 5-1
Nagbalik sa postseason ang Ryukyu Golden Kings para sa ikalawang sunod na taon matapos talunin ang Meralco Bolts, 88-79, sa Smart Araneta Coliseum. Nanguna sila sa kanilang grupo sa ikalawang magkasunod na season na may 5-1 record matapos magtapos sa ikaapat na puwesto sa 2024-25 Final Four. Isa sila sa dalawang koponan na direktang umabante sa semifinals sa pamamagitan ng automatic bye. Ang una nilang makakalaban ay ang mananalo sa pagitan ng Utsunomiya Brex at New Taipei Kings.
No. 2 seed: Taoyuan Pauian Pilots (P. LEAGUE+) 4-2
Unang koponan sa Group B na nakaseguro ng puwesto sa EASL Finals ang Taoyuan Pauian Pilots, kahit natalo sila ng 88-82 sa Ryukyu noong Pebrero 4, ngunit nanaig sa tiebreaker point differential. Nagbabalik sila sa postseason matapos ang Cinderella run hanggang Championship Game noong 2024-25 at tinapatan ang 4-2 record ng nakaraang season. Ang una nilang makakalaban ay ang Seoul SK Knights ng Group A.
GROUP C
No. 1 seed: Alvark Tokyo (B.LEAGUE) 5-1
Sa kanilang debut season, nakapasok ang Alvark Tokyo sa EASL Finals matapos talunin ang New Taipei Kings, 92-79, noong Pebrero 4. Matapos matalo sa kanilang unang laro noong Oktubre 8, nagtala sila ng limang sunod na panalo at nakuha ang No. 1 overall seed matapos talunin ang Xac Broncos, 97-93, noong Pebrero 11. Direktang umabante sila sa semifinals kasama ang Ryukyu Golden Kings.
No. 2 seed: New Taipei Kings 3-3
Nakapasok ang New Taipei Kings bilang No. 2 seed matapos matalo ang Xac Broncos at pareho silang nagtapos sa 3-3 record, ngunit nanaig ang New Taipei sa head-to-head point differential. Sila lamang ang koponan na nakapasok sa postseason sa unang tatlong season ng liga, matapos magtapos sa ikaapat na puwesto noong 2023-24 at ikatlo noong 2024-25. Makakalaban nila ang Utsunomiya Brex ng Group A sa kanilang unang laro.
Ibabalik ng EASL ang Finals sa Macau para sa inaasahang nag-aalab na sagupaan sa Asian club basketball. Iaanunsyo pa ang ticketing information, final game times, at iba pang detalye sa lalong madaling panahon.
Anim na elite na koponan. Isang kampeon. Sa pinakamalaking entablado.
Magkita-kita tayo sa Macau sa Marso 18. (EASL/HNT)
