HATAW! D'yaryo ng Bayan hatawtabloid.com
CAMP VICENTE LIM – Naaresto ang dalawang tinukoy na ‘gunrunner’ kabilang ang isang wanted person na sinabing lider ng gang at may mga kasong murder at homicide sa ilalim ng Oplan Paglalansag Omega sa Barangay Sampiruhan, Calamba City, Laguna noong Lunes ng gabi.
Ayon kay Lt. Col. Ganaban Ali, Criminal Investigation and Detection Group – CALABARZON regional director, kinilala ang mga suspek na sina Regie Abarquez, 25 anyos, sinabing lider ng Abarquez gang, at kasamahan nitong tricycle driver na si Abundio Alcaraz, 47, kapwa residente sa Pulong Kendi sa Barangay Sampiruhan.
Nasamsam sa pag-iingat nina Abarquez at Alcaraz ang dalawang kalibre .45, isang hand grenade at iba’t ibang uri ng mga bala.
Sinabi ni Ali ang dalawang suspek ay aktibong sangkot sa ilegal na pagbebenta at pamamahagi ng loose firearms. Pareho silang naging target ng ilang police operations ng CIDG Laguna mula noong 2022.
Sa pakikipag-ugnayan sa Calamba police sa pamumuno ni Col. Dennis De Guzman, nagsagawa ng bust sting laban sa ‘gang’ nina Abarquez at Alcaraz na sangkot sa pagbebenta ng mga loose firearms sa Pulong Kendi, bandang 8:11 ng gabi.
Nang mamataan ng pulisya si Abarquez ay agad na inaresto ng mga operatiba ng CIDG Laguna sa bisa ng warrant of arrest para sa kasong murder noong 2022. Idinagdag na siya ay may record sa mga operatiba ng Calamba police ng kasong homicide.
Inaresto si Abarquez sa kanya tirahan sa Barangay San Cristobal, Calamba City, ngunit nagresulta sa isang armadong enkuwentro noong 15 Oktubre 2025.
Isa sa mga miyembro ng Abarquez gang ang nagpaputok patungo sa operating unit ang namatay at dalawang pulis ang nasugatan sa operation.
Kasalukuyang nagsasagawa ng malalimang imbestigasyon ang mga tauhan ng CIDG-Laguna para pag-aralan, suriin, at subaybayan ang mga kaso ni Abarquez. (BOY PALATINO)
