HATAW! D'yaryo ng Bayan hatawtabloid.com
HINDI NAKALIGTAS sa kamatayan ang target na delivery rider, at isang estudyanteng nadamay sa enkuwentro ng mga awtoridad at ng riding-in-tandem nitong Linggo ng gabi, 1 Pebrero, sa Novaliches, lungsod Quezon.
Kinilala ang mga biktimang sina Jonari Dangalan, 29 anyos, delivery rider, residente sa Brgy. Gulod, Novaliches; at Eries John Genovatin, 24 anyos, criminology student, residente sa lungsod ng Caloocan.
Sa ulat mula sa Quezon City Police District PS-4 (Novaliches Police Station), dakong 11:20 ng gabi kamakalawa nang maganap ang insidente sa Brgy. Gulod.
Ayon kay P/Cpl Benito Catungal, sakay si Dangalan ng pulang Yamaha NMax nang sundan ng mga suspek na magkaangkas sa motor at sunod-sunod na pinaputukan ng baril.
Agad hinabol ng mga pulis ang mga suspek ngunit isa sa kanila ang nagpaputok ng baril kaya agad gumanti ng pamamaril ang mga awtoridad.
Nang tumigil ang putukan, nakitang nakahandusay at duguan ang estudyanteng si Genovatin sa tabi ng kaniyang bisikleta na nabatid na tinamaan ng ligaw na bala.
Isinugod sa Novaliches District Hospital sina Dangalan at Genovatin ngunit idineklarang dead on arrival dahil sa mga tama ng bala.
Narekober mula sa pinangyarihan ng krimen ang 11 basyo ng bala ng cal. 9mm at yuping basyo ng bala.
