HATAW! D'yaryo ng Bayan hatawtabloid.com
ALAM MO NA!
ni Nonie Nicasio
ISANG orihinal na love song ng talented na batang si Love Kryzl ang inilabas na titled “Kayong Dalawa Lang.”
Ang kanta ay wedding gift kina Kiray Celis at Stephan Estopia, bilang pagdiriwang ng kanilang paglalakbay sa buhay may-asawa. Ang pamagat ay simple ngunit may malalim na kahulugan: kapag paulit-ulit mong pinipili ang iyong kapareha, hindi imposible ang “forever.”
Maririnig sa kanta ang isang tunay na kuwento ng pag-ibig, kasiyahan, at ang mga karaniwang pagsubok na pinagdaraanan ng mga magkasintahan bago ikasal—na nagpapaalala na ang pag-ibig ay laging nagwawagi kapag pinipili ang isa’t isa araw-araw. Na ang anumang relasyon ay malalampasan ang lahat, basta’t pinipili ninyong manatili sa isa’t isa.
Ibinahagi rin ni Love Kryzl na hinahangaan niya sina Ate Kiray at Kuya Tepan niya bilang magkasintahan. Malaki ang naging inspirasyon sa kanya ng paraan ng kanilang pag-aalaga at pagmamahalan.
Ang kanta at music video ay iprinodyus ng Purple Hearts Production, isang in-house company ng Kryzl Group of Companies.
Inanunsiyo rin na si Love Kryzl ay maglulunsad ng isa pang single ngayong taon at inaasahang magkakaroon ng concert ang batang CEO sa susunod na taon.
Ang music video ng “Kayong Dalawa Lang” ay mapapanood na sa Love Kryzl Facebook Page at sa Love Kryzl’s World YouTube Channel.
Bilang paghahanda sa kanilang kasal, ibinahagi ng actress at CEO na si Kiray Celis na bumili siya ng Purple Hearts Products—ang brand na pagmamay-ari nina Love Kryzl at ng kanyang mga kapatid—para isama sa kanilang wedding giveaways.
Nang usisain kung ano ang magiging regalo niya sa kanyang Ate Kiray at Kuya Stephan sa kanilang kasal, ibinunyag ng batang CEO at artist na si Love, may pahintulot ng magkasintahan na ang ireregalo niya ang hotel reception venue at ang event styling ni Gideon Hermosa.
