HATAW! D'yaryo ng Bayan hatawtabloid.com
MATABIL
ni John Fontanilla
MAGSASAMA-SAMA sa isang gabi ng konsiyerto ang mga itinuturing na haligi ng musikang Filipino sa bansa, para makatulong sa mga kababayan nating biktima at labis na naapektuhan ng sunod-sunod na lindol.
Dalawampu’t tatlong artists at madaragdagan pa ang magsasama-sama sa iisang layunin, ang makatulong at makalikom ng salapi para sa ating mga kababayan. Ang konsiyerto ay tinawag nilang Padayon Pilipinas na gaganapin sa October 28, 2025, 6:00 p.m. sa St. Jude Catholic School, San Miguel Manila.
Hindi nagdalawang-isip na magtanghal ang mga singer para magtanghal sa Padayon Pilipinas tulad nina Dulce, Jamie Rivera, Richard Reynoso, Chad Borja, Ronnie Raymundo, Bayang Barrios, Isay Alvarez, Robert Sena, Renz Verano, Carla Guevara Laforteza, Beverly Salviejo, Vehnee Saturno, Vina Morales, David Pomeranz, Alakim, Alynna Vasquez, Jade Aben, Jedidah, MB40, Ladine Roxas, Ornella Brianna,The ForteNors, Frenchie Dy, Vhenee Saturno, at ang producer nitong si Dr. Carl Balita.
Sa presscon ng Padayon Pilipinas sa Music Box ay ipinarinig at ipinapanood sa mga invited press ang isang commemorative song at music video na may titulong Padayon Pilipinas, likha ng beteranong kompositor na si Mr. Vehnee Saturno at inawit nina Dulce at anak na sina Gem at Abby; Isay at Robert, Bayang, Renz, Richard, Chad, Beverly, Jade, Lyza at Carl.
Ang halaga ng ticket ay P1500 pero P1000 na lang kung bibili ng lima. At para makabili ng tickets, sponsorship at mga donasyon, maaaring tumawag at mag-message sa (+63) 9171037683.
