Terror ng barangay, armadong adik timbog

DINAKIP ng mga awtoridad ang isang lalaki habang nasamsam mula sa kaniya ang iba’t ibang uri ng baril at bala sa isinagawang pagpapatupad ng search warrant sa Norzagaray, Bulacan, nitong Sabado, 20 Setyembre.

Isinagawa ng mga operatiba ng Provincial Intelligence Unit (PIU) – Bulacan PPO sa pamumuno ni P/Lt. Col. Russell Dennis Reburiano, katuwang ang mga tauhan ng Norzagaray MPS, 1st PMFC, at 2nd PMFC, ang pagpapatupad ng search warrant na nagresulta sa pagkakaaresto sa suspek na kinilalang si alyas Boy, 34 anyos, residente ng Sitio Dulong Tabtab Ilog, Norzagaray.

Narekober mula sa kaniyang pag-iingat sa loob ng kaniyang bahay ang isang caliber .38 revolver, limang bala ng caliber .38, isang caliber .45 magazine, labing-isang  bala ng caliber .45, isang improvised o homemade shotgun, tatlong piraso ng 12-gauge shotgun ammunition, at isang replica ng Beretta 9mm pistol.

Inilabas ang search warrant matapos ang mga ulat mula sa mga residente ng barangay na nagsasabing ang suspek ay nagbabanta at nananakot sa mga mamamayan gamit ang baril tuwing nasa impluwensya ng ipinagbabawal na gamot.

Dinala ang naarestong suspek at ang mga nakuhang piraso ng ebidensya sa PIU Bulacan PPO para sa kaukulang dokumentasyon at disposisyon.

Kasalukuyang inihahanda na ang kasong kriminal laban sa kanya para sa paglabag sa RA 10591 (Comprehensive Firearms and Ammunition Regulation Act).

Binigyang-diin ni P/Col. Angel Garcillano, provincial director ng Bulacan PPO, na ang walang humpay na operasyon laban sa mga masasamang elemento ay patuloy na isinasagawa upang matiyak ang kaligtasan at kaayusan sa lalawigan. (MICKA BAUTISTA)