P1.7-M shabu huli sa 2 tumandang tulak sa Bulacan

DALAWANG lalaki na sinasabing tumanda na sa pagtutulak ng ilegal na droga ang nahulog sa kamay ng batas sa isinagawang anti-illegal drug operations sa Bulacan.

Sa ulat mula kayPLt.Colonel Leopoldo L/ Estorque Jr., acting chief of police ng Calumpit MPS, si alyas “Sacho”, 63-anyos, tricycle driver na residente ng Brgy. San Marcos, Calumpit ay naaresto ng mga operatiba ng  Calumpit MPS Station Drug Enforcement Unit (SDEU) dakong alas-10:45 ng gabi kamakalawa.

Narekober ng mga operatiba sa suspek ang  200 gramo ng shabu na may halagang P1, 360, 000.00, isang black sling bag, weighing scale, assorted drug paraphernalias, empty sachets at marked boodle money na ginamit sa operasyon.

Samantala, sa bayan ng Santa Maria, sa ulat naman mula kay P/Lt. Colonel Voltaire Rivera, hepe ng Santa Maria MPS. ay arestado si Angelito Pabito y Verano, alyas Kalbo, 50-anyos, na isang high value individual (HVI), tubong Tondo, Maynila at residente ng Sitio Hulo, Alday Compound, Brgy. Mag-asawang Sapa, Santa Maria.

Napag-alamang isang Anti-Illegal Drug (Buy-Bust) Operation ang isinagawa ng mga elemento ng SDEU ng Santa Maria MPS na nagresulta sa pagkakadakip kay alyas “Kalbo” kamakalawa.

Nakumpiska sa suspek ang  humigit-kumulang 60 gramo ng hinihinalang shabu, na may standard drug price na Php 408,000.00 at ang PhP1, 000 pera na ginamit bilang buy-bust money. 

Ayon kay Police Colonel Angel Garcillano, provincial director ng Bulacan PPO, ang  pagkakaaresto kina alyas “Sacho” at alyas “Kalbo” ay nagpapatunay ng kanilang masidhing hangarin na masugpo ang pagkalat ng iligal na droga sa lalawigan. (MICKA BAUTISTA)