HATAW! D'yaryo ng Bayan hatawtabloid.com
BINIGYANG-DIIN ng ika-31 punong hepe ng Philippine National Police (PNP) na hindi kailangan ang maraming salita sa halip ay ipakita sa gawa bilang atas sa mga kapwa-pulis sa pagtupad ng kanilang tungkulin.
Kahapon ng umaga, opisyal nang umupo si Gen. Nicolas Torre III bilang Chief PNP kasabay ng pagreretiro ni PGen. Rommel Francisco Marbil sa isang seremonyang dinalohan ni Pangulong Ferdinand Marcos, Jr., sa Kampo Heneral Rafael T. Crame sa Cubao, Quezon City.
Sa pagsisimula ng kanyang tungkulin, sinabi ni Torre III na tatlong bagay ang kanyang magiging basehan sa kanyang panunungkulan.
Kinabibilangan ito ng mabilis at patas na pagseserbisyo sa publiko; pagkakaisa at pagpapataas ng moral; ang huli, accountability at modernization.
Ipinaliwanag ni Torre, sa ilalim ng mabilis at patas na pagseserbisyo, ipatutupad na ang 3-minute response sa buong bansa gamit ang 911 at pagpapaigting ng police visibility.
Binigyang-diin na pinakaepektibo pa rin ang pagpapatrolya ng mga pulis sa lansangan laban sa nagbabantang krimen.
Titiyakin ni Torre ang pagkakaisa ng lahat ng PNP personnel upang mas maayos ang organisasyon at paiiralin ang respeto sa bawat isa.
Palalakasin ang pagsasanay ng mga pulis upang mas lalong maging epektibo sa pagpapatupad ng peace and order sa bansa.
Hindi na puwede ang ‘pogi points’ at sa halip ay dapat na tiyakin ng bawat pulis na tama ang kanyang trabaho.
Walang puwang sa liderato ni Torre bilang PNP chief ang padrino system at sa halip ay pararangalan ang mga karapat-dapat sa promosyon.
Bagamat kailangan ang modernisasyon, sinabi ni Torre na gagamitin ang bagong kagamitang binili ng PNP sa ilalim ni Marbil upang mas maging epektibo ang responde sa mga emergency cases.
Muli, hinamon niya ang kanyang mga tauhan na huwag puro salita sa halip ay ipakita sa gawa. (ALMAR DANGUILAN)
