HATAW! D'yaryo ng Bayan hatawtabloid.com
NAKAMIT nina Shaunna Polley at Olivia Macdonald ng New Zealand ang kanilang ikalawang titulo sa loob ng dalawang linggo matapos magwagi sa Volleyball World Beach Pro Tour Futures Nuvali laban sa koponang Hapones na sina Sakura Ito at Mayu Sawame, sa iskor na 21-18, 21-14, nitong Linggo sa Lungsod ng Santa Rosa, Laguna.
Matapos ang kanilang pagkapanalo sa Asian Volleyball Confederation Beach Tour Phu Yen Open sa Vietnam noong nakaraang linggo, ipinagpatuloy ng mga Kiwi ang kanilang magandang laro para masungkit ang sunod-sunod na gintong medalya, kasunod ng dalawang silver finishes, kabilang na ang AVC Beach Tour Nuvali noong nakaraang buwan.
“Masaya kaming makabalik dito at makakuha ng ginto,” ani Polley. “Talagang natutuwa kami. Nakakalaro kami nang tuloy-tuloy at ang matapos ang dalawang linggo na may dalawang ginto ay kamangha-mangha.”
Nagwagi naman sina Lubos Nemec at Adrian Petruf ng Slovakia sa isang napakatinding laban kontra kina Eylon Elazar at Kevin Cuzmiciov ng Israel, sa iskor na 21-15, 18-21, 19-17, para sa gintong medalya sa men’s division.
Tinalo nina Elazar at Cuzmiciov ang mga Pilipinong sina James Buytrago at Rancel Varga sa quarterfinals ng torneo na inorganisa ng Philippine National Volleyball Federation sa pamumuno ni Ramon “Tats” Suzara, na siya ring pangulo ng Asian Volleyball Confederation at Executive Vice President ng FIVB.
Binigyang-diin nina Polley at Macdonald na ang paglahok sa mga FIVB Volleyball World tournaments tulad ng BPT Futures Nuvali, na nilahukan ng mga koponan mula sa 19 na bansa, ay may kakaibang hamon at masaya silang nagwagi sa kabila nito.
“Mataas talaga ang antas ng kompetisyon. Hindi mo alam kung ano ang aasahan. Alam naming magiging mahirap ito at nakalaban namin ang ilang napakahuhusay na koponan,” sabi ni Polley.
Pinuri naman ni Macdonald ang mga Haponesa na umani ng paghanga mula sa mga manonood dahil sa kanilang determinasyon.
“Napakahusay ng kanilang depensa. Kahanga-hanga rin ang kanilang mga serve. Lagi silang masarap kalaban dahil iba talaga ang estilo ng kanilang laro,” sabi ng dating manlalaro ng University of Arizona.
Nakamit nina Ieva Dumbauskaite at Gerda Grudzinskaite ng Lithuania ang bronze medal sa women’s division matapos talunin sina Beata Vaida at Francesca Alupei ng Romania, sa iskor na 21-19, 19-21, 19-17.
Sa kanilang paglalakbay patungo sa medal round, tinalo nina Vaida at Alupei ang mga Pilipinang sina Kat Epa at Honey Grace Cordero sa Round of 12, at pinatalsik naman sina Sisi Rondina at Bernadeth Pons sa quarterfinals.
Sa men’s division, ang bronze medal ay nasungkit nina Oskars Bulgacs at Matiss Graudins ng Latvia matapos talunin ang mga Griyego na sina Stavros Ntallas at Dimitris Chatzinikolaou, sa iskor na 21-15, 19-21, 15-5. (HNT)
