Kim Rodriguez nominado sa Taipei International Film Festival 

MATABIL
ni John Fontanilla

SIMPLE pero masayang-masaya ang kapamilya actress na si Kim Rodriguez sa pagseselebra ng kanyang kaarawan kamakailan kasama ang pamilya, malalapit na kaibigan sa loob at labas ng showbiz at ang manager na si Ogie Diaz.

Kung dati-rati ay laging para sa kanyang sarili ang wish, ngayon ay para sa mga bata sa boystown.

“Dati ang wish ko lagi para sa akin, pero ngayon noong nakita ko ulit ‘yung mga bata sa boystown, wish ko na sana ipanalo ni Lord lahat ng mga bagets doon.

“Siguro ganoon talaga Tito John, kapag tuloy-tuloy ang blessings na dumarating sa buhay mo, mas gusto mo na lang makatulong sa iba.

“Masarap kasi tingnan na may mga tao kang natutulungan at napapangiti kahit sa maliit na paraan katulad ng mga bata sa boystown,” sabi pa ni Kim.

Bukod sa regular itong napapanood sa Batang Quaipo ibinalita rin nito na nakatakda siyang pumunta ng Taiwan sa August 31 dahil nominado siya sa Taipei International Film Festival for Most Promising Female Actress of the year.

“Sobrang saya po dahil may Taiwan po ako sa August 31, may invitation po ako para pumunta roon, dahil nominated po ako sa Taipei International Film Festival for Most Promising Female Actress of the year. “

“Nakakataba ng puso ‘yung mapansin ang talento mo sa ibang bansa, napagandang regalo sa kaarawan ko,” pagtatapos ni Kim.