Divine Divas binigyan pa ng pakpak para mas makalipad

HARD TALK
ni Pilar Mateo

PANDEMYA. Hindi mapakali ang mga utak at puso. Kailangan pa ring gumalaw. Lumaban sa buhay at sa lumalaban sa buhay.

Teknolohiya. May silbi pala. Tiktok. Kumu. Basta pwedeng maging daan pa rin para kahit paano, magka-hanapbuhay. Kahit ang tanikala ay hindi nangakong ikaw ay makakakawala.

‘Yun sina Brigiding, Viñas Deluxe, at Paula Nicole Smith. Kalaunan, Divine Divas na sila.

At ang ginawa nila sa tulong ng teknolohiya ay magdadala pala sa katuparan ng isang pangarap. Manganganak pala ito. Concert. May naniwala.

At ngayon, ang mga “dream girls” ay magpapalaganap pa na maalagaan ang mg iba pang pangarap na mga gaya nila.

Sa January 17, 2024 may bar na magso-soft opening. RAMPA DRAG CLUB! 

Ang tatlong diva? Sila lang naman ang magmamay-ari nito. Sa tulong ng aktor, producer, entrepreneur at iba pa na si RS Francisco, ang negosyanteng si Ms. Cecille Bravo, si Louie Gin Cabel, at ang power couple na sina Ice Seguerra at Liza Diño.

Binigyan sila ng mga pakpak para makalipad. 

At ang nasabing club ay hindi lamang para sa mga miyembro ng LGBTQIA + kundi para sa lahat ng nagnanais lang na makapanood ng ibang klase ng entertainment na pangungunahan ng Divine Divas at kanilang nga ginu-groom na performers.

Masaya si RS, dahil pangarap din niya na magkaroon ng lugar na maghahatid ng kakaibang klase ng entertainment sa mga tao. 

So, people from all walks of life can mingle, babae, lalaki, bakla, tomboy, trans and more.  Na ang hatid ay maipagmalaki ang kakayanan ng bawat isang rarampa sa entablado na makilala hindi lang dito kundi sa buong mundo.

Sa mga ipinakilalang drags sa presscon ng Rampa, may lalaki at babae na mga straight na nag-perform as drag queens. Ang husay!

Kaya, ngayong wala na ang sumpa ng pandemya, sumama na sa rampa!