HATAW! D'yaryo ng Bayan hatawtabloid.com
HATAW News Team
DALAWA katao ang iniulat na namatay sa pagguhong naganap sa Bgy. Ynaguingayan, Pambujan, Northern Samar kasunod ng malawakang pagbaha dulot ng walang tigil na pag-ulan resulta ng shearline, sa 11 bayan ng lalawigan kahapon ng umaga.
Batay sa social media page ng Northern Samar News & Information, ang isang biktima, kinilala sa tawag na ‘Mana Clara’ habang ang batang biktima ay hindi kilala. Nanatili ang mga labi ng dalawang biktima sa barangay hall hanggang kahapon dahil imposible pa itong ibiyahe.
Tinatayang mahigit sa 35,000 katao ang inilikas at inihaon para dalhin sa mas ligtas na lugar sa gitna ng mabilis na paglawak ng baha sa mga lalawigan ng Northern at Eastern Samar nitong Martes, 21 Nobyembre 2023.
Kasunod nito, idineklara ni Northern Samar Governor Edwin Ongchuan ang suspensiyon ng klase sa buong lalawigan mula nitong Lunes, 20 Nobyembre bilang pag-iingat at para tiyakin ang kaligtasan ng mga estudyante, mga guro, at mga kawani dahil sa masamang lagay ng panahon sa pagtatapos ng nagdaang linggo.
Ayon sa Philippine Atmospheric, Geophysical and Astronomical Services Administration (PAGASA), ang shear line sa Northern Samar ay nagbuhos katumbas ng halos isang buwang ulan sa loob ng isang araw.
Kahapon, maraming kalsada ang hindi nadaraanan ng mga sasakyan kabilang ang Catarman-Laoang road;
Pangpang-Palapag-Mapanas-Gamay-Lapinig-Arteche boundary road; at iba pang barangay roads sa Nipa, Maragano, at Cabatuan, sa bayan ng Palapag, sa lalawigan ng Northern Samar.
Sa ulat ng Police Regional Office-Eastern Visayas, umabot sa 1,082 evacuation centers ang binuo para sa mga apektadong lugar, 54 dito ang okupado sa Northern Samar, at tatlo sa Eastern Samar.
Ang kabuuang bilang ng mga pamilyang inilikas ay 6,038; 5,843 sa Northern Samar at 195 sa Eastern Samar. Kung susumahin ito ay binubuo ng 34,723 bakwit sa Northern Samar at 655 bakwit sa Eastern Samar, ulat ng police regional command nitong Martes.
Sa kabila ng masamang kondisyon ng panahon dulot ng shearline, walang biyaheng panghimpapawid ang nakansela
Gayonman, 26 lugar ang walang elektrisidad, kabilang ang 24 bayan ng Northern Samar, at dalawang munisipalidad sa Eastern Samar — ang Jipapad at Maslog.
Nagpalarga ang Department of Social Welfare and Development (DSWD) sa rehiyon ng ayuda para sa mga apektadong lugar na umabot sa P3,445, 286.03 ang kabuuang halaga, para sa 4,785 family food packs na ipinamahagi nitong Martes.
Humiling ng family food packs ang mga bayan ng Arteche (1,187), Dolores (1,500), Jipapad (2, 715), Maslog (227), at Oras (3,000).
Sa Samar, humiling din ng ayuda ang mga bayan ng Gandara (2,000), Sta. Margarita (1,613), at San Jorge (2,193), at mga apektadong bayan sa rehiyon.
Ang family food pack ay naglalaman ng dalawang delatang sardinas, four cans of corned beef, four cans of tuna flakes, five sachets of instant coffee, five sachets of choco malt, at anim kilong bigas.
Lumahok na rin ang Tacloban-based humanitarian group Angels on Wheels, kasama ang ibang concerned citizens, sa paglulunsad ng relief efforts sa mga binahang lugar sa dalawang lalawigan.
Ayon kay Rev. Fr. Potenciano Dulay, mayroong 157 pamilya at 814 indibidwal ang nakasilong sa Catarman Cathedral at sa Annex building nito. Umaasa sila ng tulong mula sa pamahalaan at sa ilang kawanggawa para sa pangangailangan ng mga bakwit.
Nitong Lunes, 20 Nobyembre, bago ang walang tigil an pag-ulan, naramdaman ang magnitude 5.8 lindol sa ilang bahagi ng Samar — sa Eastern Samar, Eastern Samar, Biliran, Northern Samar, at Leyte dakong 12:59 pm.
Ayon sa PAGASA, ang shear line ay ang pagsasalubong sa isang makipot na daanan ng malamig na hanging amihan at ng mainit na hangin mula sa Pacific Ocean na nagdudulot ng pagkulog, pagkidlat, at patuloy na pagbuhos ng ulan.
